24.6c
Երեվան
երկ, հլս 06
Երէկ իրենց լրումին հասան Համահայկական 7-րդ խաղերը։ Հայաստանի հանրապետութեան Վարչապետին բարձր հովանաւորութիւնը վայելող համահայկական խաղերու փակման հանդիսաւոր արարողութեան ընթացքին խօսք առնելով Փաշինեան շեշտը դրաւ հայութեան միասնութեան եւ միասնականութեան գաղափարին վրայ։
Հանդիսութեան աւարտին վարչապետը մրցանակներ բաշխեց մասնակից խումբերուն, որոնց հերթին ալ «արդար խաղի» մրցանակը յանձնուեցաւ խաղերուն մասնակից Հալէպի խումբին։
Սուրիան քաոսային վիճակի հասցուցած եւ դժուարին օրերու բովին մէջ դրած արիւնալի պատերազմը մեծ հարուած հասցուցած էր նաեւ Հալէպի հայութեան։
Սակայն, ինչպէս այլ առիթներով այս անգամ եւս Հալէպահութիւնը իր փայլուն ներկայութեամբ, Հալէպահայ մարզիկներու կամքի ուժով եւ ամբողջ սուրիահայութեան կորովն ու ապրելու կամքը ցոյց տուող ոգիով հալէպահայութիւնը ցոյց տուաւ, որ տէրն է իր կոչումին։
Հալէպահայութիւնը պատնէշի վրայ էր երէկ, երբ հրթիռները կը հարուածէին արեւմտահայութեան կարեւոր կեդրոն-ոստան ՝ Հալէպը ու այսօր եւս Հալէպահայութիւնը տէրն էր իր կոչումին եւ կը շարունակէ մնալ պատնէշի վրայ, այնքան ժամանակ, որ անոր երտասարդ մարզիկներու երակներէն կը շարունակէ վազել կորովով լեցուն հայու արիւնը։
Պատնէշի վրայ մնալը, միայն ապրելու ոճ չէ, պատնէշի վրայ մնալը, միայն ձեւականութիւն չէ, այլ պատնէշի վրայ մնալը ամէնէն առաջ առաքելութիւն է։
Հալէպահայութիւնը այսօր եւս ցոյց տուաւ իր կամքի ուժը ու անոր համար պիտի գրենք ՝ յարգանք քեզ Հալէպահայ զինուոր, յարգանք քեզ Հալէպահայ մարզիկ, յարգանք քեզ Հալէպահայ աշակերտ, յարգանք ձեզ Հալէպահայ ուսուցիչ ու ծնող։
Յարգանք քեզ արեւմտահայոց ամէնէն խոր արմատներուն կառչած ՝Հալէպահայ ժողովուրդ։
Դուն դարձեալ կառչած ես քու հողիդ ու անգամ մը եւս աչքդ յառած Արեւմտահայոց մեծ երազին ու դատին, որուն իրական ճանապարհները կ՚անցնին միայն Երեւանէն։
Յարգանք քեզ։
«ԱՐԵՒԵԼՔ»
