18.19c
Երեվան
երկ, հլս 06
Պէյրութի Հայ Կաթողիկէ Սուրբ Խաչ-Հարպոյեան բարձրագոյն վարժարանի մանկապարտէզը քսան տարի շարունակ վայելած է տիկին Լենա Տէրտէրեանի հոգատար, նուիրեալ եւ լուսաւոր առաջնորդութիւնը։ Սերունդներ անցած են անոր խնամքէն, սորված՝ սիրոյ, կարգապահութեան եւ վստահութեան առաջին դասերը, եւ այսօր դպրոցի ընտանիքը երախտագիտութեամբ կը մեծարէ անոր երկարամեայ ծառայութիւնը։
Ստորեւ «Արեւելք»ի ընթերցողներուն կը ներկայացնենք այդ մասին Վարժարանի Տնօրէն՝ Տիար Արամ Գարատաղլեանի գրառումը՝
«Սիրելի տիկին Լենա,
Պատիւ էր ինծի համար Ձեր աշակերտը ըլլալ, իսկ այսօր աւելի մեծ առանձնաշնորհում է Ձեզ իմ կողքին ունենալը՝ միասին առաջնորդելու համար այն դպրոցը, զոր հպարտութեամբ մեր տունը կը կոչենք։
Երանելի են այն սերունդները, որոնք Ձեր քսանամեայ նուիրեալ ծառայութեան ընթացքին անցած են Սուրբ Խաչ-Հարպոյեան բարձրագոյն վարժարանի մանկապարտէզէն՝ Ձեր ղեկավարութեան ներքեւ։ Յատկապէս երախտապարտ եմ, որ թէ՛ աղջիկս եւ թէ՛ տղաս եւս անոնց շարքին եղած են։
Առաւել եւս բախտաւոր պիտի ըլլան այն երեխաները, որոնք տակաւին պիտի վայելեն Ձեր անսասան հոգածութիւնը, անսահման սէրը եւ օրինակելի նուիրումը, մինչ Դուք կը շարունակէք սիրով ու պատասխանատուութեամբ կերտել մատղաշ հոգիներու կեանքը։
Ձեր քսանամեայ բացառիկ ծառայութիւնը՝ իբրեւ մեր մանկապարտէզի բաժնի պատասխանատու, պատուելը նուազագոյնն էր, զոր կրնայի ընել՝ ի գնահատանք այն ամէնուն, ինչ Դուք տուած էք մեր դպրոցական համայնքին։
Շնորհաւորութիւններ այս լիովին արժանի հանգրուանին առիթով, եւ խորին շնորհակալութիւն՝ երկու տասնամեակ ոգեշնչող ծառայութեան համար։ Թող Աստուած շարունակէ օրհնել Ձեզ՝ պարգեւելով երկար տարիներու յաջողութիւն, բաւարարութիւն եւ նորանոր իրագործումներ»։
