Լիբանանի պասքեթպոլի մրցումներու ծիրէն ներս կիրակի օր տեղի ունեցած մրցումի աւարտին, արաբական Սաժես խումբի համակիրներ յարձակած են ՀՄԸՄ-ի պատասխանատուներէն Ճորճ Սապունճեանի վրայ:
ՀՄԸՄ մարզական ակումբը դատապարտած է եղածը եւ այդ առումով ալ հրապարակած է հաղորդագրութիւն մը, զորս կը ներկայացնենք ստորեւ.-
ՀՄԸՄ-ի Լիբանանի Շրջանային վարչութիւնը երէկ` 21 յունուարին հրապարակեց հետեւեալ հաղորդագրութիւնը.
Մեկնելով կիրակի, 20 յունուար 2019-ին, Ղազիրի մէջ Սաժես եւ Շանվիլ ակումբներուն միջեւ տեղի ունեցած պասքեթպոլի մրցումին ընթացքին արձանագրուած հարցերէն եւ միջադէպերէն` կ’ուզենք կատարել հետեւեալ յստակացումները.
- ՀՄԸՄ-ը խստօրէն կը դատապարտէ Լիբանանի պասքեթպոլի ֆետերասիոնին մէջ միութեանս ներկայացուցիչ Ճորճ Սապունճեանին վրայ կատարուած յարձակումները, յատկապէս Սաժեսի կարգ մը համակիրներուն կողմէ:
- Միութիւնս պատկերասփիւռի «Էլ. Պի. Սի.» կայանէն սփռուած տեսարանները կը պահանջէ նկատի ունենալ իբրեւ տեղեկութեան փոխանցում` ապահովական եւ դատական իշխանութիւններուն:
- Մրցումի աւարտին յաջորդած դէպքերուն եւ հրմշտուքին ընթացքին արձանագրուած վիրաւորներուն կը մաղթէ շուտափոյթ ապաքինում:
- Վարչութիւնս կը հրաւիրէ համապատասխան ապահովական մարմինները անհրաժեշտ քայլերուն դիմելու եւ հետաքննութիւն կատարելու` պատրաստակամութիւն յայտնելով իր կարելիութիւնները դնելու տուեալ մարմիններուն տրամադրութեան տակ, որպէսզի կարելի ըլլայ միջադէպերուն պատճառ դարձողներէն հաշիւ պահանջել եւ արգիլել նման դէպքերու կրկնութիւնը` ի խնդիր բարձր ոգիով մրցակցութեան եւ քաջալերելով մարզական մաքուր խաղը:
- Շրջանային վարչութիւնս կը դիմէ քոյր ակումբ Սաժեսի նորընտիր վարչական մարմինին` պահանջելով, որ սանձէ իր համակիրները, ցաւ յայտնելով այն միջադէպերուն համար, որոնք արձանագրուեցան մրցումի աւարտին` յուսալով, որ յաջորդ մրցումները կը կատարուին մարզական ոգիով:
ՀՄԸՄ-Ի ԼԻԲԱՆԱՆԻ ՇՐՋԱՆԱՅԻՆ ՎԱՐՉՈՒԹԻՒՆ
Միացիր մեզ Տելեգրամում
Միացիր մեզ Յութուբում
Կիսվել
