30.6c
Երեվան
հնգ, հլս 02
Քաթարցի եւ փաքիստանցի միջնորդները յուլիս 1-ին, Տոհայի մէջ, աւարտած են Միացեալ Նահանգներու եւ Իրանի բանակցողներու հետ առանձին հանդիպումներ ունեցած են, որոնց ընթացքին առաջընթաց արձանագրուած է։ Այս մասին X-ի իր էջին վրայ գրած է էմիրութեան արտաքին գործոց նախարարութեան պաշտօնական ներկայացուցիչ Մաժիտ պըն Մոհամմետ ալ-Անսարին։
«Քաթարցի եւ փաքիստանցի միջնորդները յուլիս 1-ին Տոհայի մէջ աւարտած են ամերիկացի եւ իրանցի բանակցողներու հետ ունեցած առանձին հանդիպումները։ Լիւցեռնի գագաթաժողովի արդիւնքներուն հիման վրայ դրական առաջընթաց արձանագրուած է Իսլամապատի փոխըմբռնման յուշագիրին առնչուող հարցերուն շուրջ»,– գրած է ան։
Քաթարի արտաքին գործոց նախարարութեան ներկայացուցիչը աւելցուցած է, որ կողմերը համաձայնած են շարունակել երկխօսութիւնը։
«Յաջորդ հանդիպումը պիտի նշանակուի կարելի եղածին չափ սեղմ ժամկէտի մէջ՝ Իրանի նախկին գերագոյն առաջնորդի մահուան առիթով կազմակերպուած սուգի արարողութիւններու աւարտէն ետք»,– նշած է ալ-Անսարին։
Իրանի արտաքին գործոց փոխնախարար Քազեմ Ղարիպապատին, իր կարգին, յայտնած է, որ Քաթարի եւ Փաքիստանի միջնորդներուն հետ երկու փուլով հանդիպումներ տեղի ունեցած են։
Առաջին հանդիպման ընթացքին իրանական պատուիրակութիւնը բարձրացուցած է Միացեալ Նահանգներու կողմէ ռազմական գործողութիւններու դադրեցման վերաբերեալ համաձայնութեան խախտման հարցը։
Երկրորդ հանդիպումը նուիրուած եղած է իրանական սառեցուած միջոցներէն 6 միլիառ տոլարի ապասառեցման խնդրին։ Կողմերը նաեւ որոշած են ստեղծել հաղորդակցութեան խողովակ, որու միջոցաւ պիտի արձանագրուին փոխըմբռնման յուշագիրի խախտումները։
