22.09c
Երեվան
շբթ, մյս 09
Հակառակ պաշտօնական լրատւութեան բացակայութեան Անգարա կոպիտ կերպով արձագանգած է Համբիկ Սասունեանի անպարտ արձակման մասին շրջան ընող տեղեկութիւններուն։
Այս մասին տեղեկութիւնը կը հաղորդէ «Սփութնիք» ծառայութեան արաբական բաժինը նշելով նաեւ, որ Թուրքիոյ ԱԳՆ-ն յատուկ հաղորդագրութիւն մը հրապարակած է խնդրին վերաբերեալ նշելով, որ հակառակ Թուրքիոյ կողմէ տարուած ճիգերուն եւ ճնշումներուն Լոս Անճելոսի դատական մէկ մարմինը պայմանաւորեալ ազատութիւն շնորհած է Համբիկ Սասունեանին։
Թուրքիոյ ԱԳՆ-ի հրապարակման մէջ շեշտեր կը դրուին ահաբեկչութեան դէմ պայքարին եւ Սասունեանին շնորհուելիք ազատութիւնը կը համարուի կոպիտ խախտում միջազգային բոլոր արժէչափերուն եւ համաձայնագրերուն։
Նշենք, որ Թուրքիոյ կողմէ տարածուած այս տեղեկութիւնները կը միտին ժխտական մթնոլորտ մը ձեւաւորել եւ նոյնիսկ խափանել Սասունեանի ազատ արձակումը, որ մինչեւ այս պահը տեղի չէ ունեցած եւ ինչպէս նշեցինք այդ մասին, որեւէ պաշտօնական տուեալ կամ հաշորդագրութիւն չէ հրապարակուած։
Յիշեցնենք, որ 1982 թուականին Լոս Անճելոսի մօտ Թուրքիոյ հիւպատոս ` Քեմալ Արգանը զգետնած Համբիկ Սասունեան հայ քաղաքական բանտարկեալ է եւ տարբեր առիթներով կարեւոր ճիգեր իրականացուած են անոր ազատութիւնը ապահովելու համար, որոնք միշտ ալ բախած են Անգարայի եւ անոր լծակներու կողմէ գործի դրուած սադրանքերուն։
