18.09c
Երեվան
կրկ, հնս 01
Լիբանանի մէջ Ռուսիոյ դեսպանը, օրերս, այցելած է Անթիլիաս եւ Արամ Ա. վեհափառ հայրապետին հետ հանդիպում ունեցած։ Անոր ընկերակցած է Լիբանանի ու Սուրիոյ ռուս համայնքի առաջնորդ հայր Ֆիլիփի, որ ռուս եկեղեցւոյ պետ Քիրիլ պատրիարքին եղբայրական ողջոյնները փոխանցած է վեհափառ հայրապետին:
Այս մասին «Արեւելք» տեղեկութիւն քաղեց Պէյրութի մեր պաշտօնակից՝ «Ազդակ»էն։
Ստորեւ՝ թղթակցութիւնը ամբողջութեամբ։
Երկուշաբթի, 12 մայիս 2025-ի երեկոյեան, Անթիլիասի մայրավանք այցելեց եւ Արամ Ա. վեհափառ հայրապետին հետ հանդիպում ունեցաւ Լիբանանի մէջ Ռուսիոյ Դաշնութեան դեսպան Ալեքսանտր Ռուտաքով` ընկերակցութեամբ Լիբանանի ու Սուրիոյ ռուս համայնքի առաջնորդ հայր Ֆիլիփի: Վերջինս ռուս եկեղեցւոյ պետ Քիրիլ պատրիարքին եղբայրական ողջոյնները փոխանցեց վեհափառ հայրապետին:
Աւելի քան մէկ ժամ տեւած հանդիպման ընթացքին խօսակիցները անդրադարձան Հայաստանի, Ռուսիոյ ու Ազրպէյճանի յարաբերութիւններուն, ընդհանրապէս Միջին Արեւելքի կացութեան, հայ եւ ռուս եկեղեցիներու փոխյարաբերութեան, ինչպէս նաեւ Լիբանանի հետ աղերս ունեցող խնդիրներու:
Յիշեալ հարցերուն շուրջ տեսակէտներու ու մտահոգութիւններու փոխանակում կատարուեցաւ յատկապէս վեհափառ հայրապետին եւ դեսպանին միջեւ:
