0.09c
Երեվան
հնգ, դկտ 12
Այս տարի, ԱՄՆ Արեւելեան Թեմի Ազգային Առաջնորդարանի արդէն աւանդական դարձած Գոհաբանական տօնախմբութիւնը նուիրուած եղած է Արեւելեան ԱՄՆ-ի բարեջան Առաջնորդ՝ Գերշ. Տ. Անուշաւան Արք․ Դանիէլեանի, Թեմէն ներս 40-ամեայ ծառայութեան։
Առաւօտուն, Առաջնորդ Սրբազան Հայրը կատարած է պատարագ Սուրբ Սարգիս (Տակլըսթըն, Նիւ Եորք) եկեղեցւոյ մէջ, որուն հետեւած է ճաշկերոյթ։
Այս մասին «Արեւելք» տեղեկացաւ ԱՄՆ Արեւելեան Թեմի Ազգային Առաջնորդարանի դիմատետրի էջէն։
Ստորեւ՝ ներկայացուած լրատւութիւնը։
Կիրակի, 24 Նոյեմբերին, տեղի ունեցաւ Ազգային Առաջնորդարանի Գոհաբանութեան աւանդական տօնախմբութիւնը, որ նուիրուած էր Թեմիս բարեջան Առաջնոդ՝ Գերշ. Տ. Անուշաւան Արքեպիսկոպոսի ծառայութեան 40ամեակին Թեմէն ներս։
Առաջնորդ Սրբազան Հայրը առաւօտուն Ս. Պատարագ մատուցանեց Ս. Սարգիս եկեղեցւոյ մէջ (Տակլըսթըն, Նիւ Եորք)։ Յաւարտ Ս. Պատարագի, տեղի ունեցաւ տօնախմբութիւնը Terrace on the Park սրահին մէջ։ Թեմի տարբեր շրջաններէն եկած եկեղեցականներ, համայնքային ղեկավարներ եւ ծխականներ եկած էին իրենց երախտագիտութիւնն ու գնահատանքը յայտնելու Անուշաւան Արքեպիսկոպոսի երկարամեայ վաստակին ու ծառայութեան համար։
Յայտագրի ընթացքին ընթերցուեցաւ Ն.Ս.Օ.Տ.Տ. Արամ Ա. Վեհափառ Հայրապետի օրհնութեան գիրը։ Ազգային Վարչութեան ատենապետ՝ գնդ. Արամ Սարաֆեան, եւ Կրօնական Ժողովի փոխ-ատենապետ՝ Գերպ. Տ. Պօղոս Ծ. Վրդ. Թինքճեան, խօսք առին ի գնահատում Սրբազան Հօր։ Տեղի ունեցաւ գեղարուեստական յայտագիր, յաւուր պատշաճի տեսերիզի մը ցուցադրութիւնը, իսկ աւարտին՝ Առաջնորդ Սրբազան Հայրը իր շնորհակալութեան ու գնահատանքի սրտի խօսքը արտասանեց։
