-2.91c
Երեվան
երկ, դկտ 22
Արցախի արտաքին գործոց նախարարութիւնը ողջունած է ՄԱԿ-ի Անվտանգութեան խորհուրդին դիմելու Հայաստանի կառավարութեան որոշումը:
«Ողջունում ենք Հայաստանի Հանրապետութեան Կառավարութեան որոշումը դիմել ՄԱԿ-ի Անվտանգութեան խորհրդին՝ Լաչինի միջանցքի աւելի քան ութ ամիս շարունակուող անօրինական արգելափակման եւ Արցախի անմարդկային պաշարման հետեւանքով ստեղծուած ծայրայեղ ծանր հումանիտար իրավիճակը քննարկման դնելու խնդրանքով»,-ըսուած է հաղորդագրութեան մէջ:
Արցախի դիւանագիտական գերատեսչութիւնը ընդգծած է, որ 8 օգոստոսին Արցախի նախագահը դիմած է ՀՀ կառավարութեան՝ կոչ ընելով անյապաղ ՄԱԿ-ի Անվտանգութեան խորհուրդի քննարկման ներկայացնել Ատրպէյճանի կողմէ Լաչինի միջանցքի արգելափակման հետեւանքով Արցախի մէջ առաջացած մարդասիրական աղէտը:
«ՄԱԿ-ի Անվտանգութեան խորհրդի ուղիղ ներգրաւուածութիւնը եւ համապատասխան հրատապ որոշումների ընդունումը համարում ենք կարեւորագոյն գործօն, որը կարող է վերջ դնել Ադրբեջանի կողմից Արցախում մարդու իրաւունքների զանգուածային կոպիտ խախտումներին եւ դադարեցնել Արցախի ժողովրդի դէմ Ադրբեջանի կողմից հետեւողականօրէն ու համակարգուած ձեւով իրականացուող ակնյայտ ցեղասպան քաղաքականութիւնը»,- նշած է Արցախի արտաքին գործոց նախարարութիւնը:
«Կոչ ենք անում ՄԱԿ-ի Անվտանգութեան խորհրդին, որը կրում է միջազգային խաղաղութեան եւ անվտանգութեան պահպանման, ցեղասպանութիւնների եւ այլ զանգուածային ոճրագործութիւնների կանխարգելման, ինչպէս նաեւ ՄԱԿ-ի Արդարադատութեան միջազգային դատարանի որոշումների կատարումն ապահովելու հիմնական պատասխանատւութիւնը, պատշաճ կերպով արձագանգել ստեղծուած իրավիճակին եւ կայացնել որոշում Լաչինի միջանցքի ամբողջական, անյետաձգելի եւ անվերապահ ապարգելափակմանն ուղղուած անհրաժեշտ, հրատապ եւ արդիւնաւէտ միջոցների իրականացման մասին»,- ըսուած է հաղորդագրութեան մէջ։
