37.2c
Երեվան
կրկ, օգս 02
Աշխատանքային այցով Արցախի Հանրապետութիւն գտնուող վարչապետ Նիկոլ Փաշինեան ԱՀ նախագահ՝ Արայիկ Յարութիւնեանի հետ այցելած է «Պէյս Մեթըլս» ընկերութեան Կաշէնի լեռնահանքային համալիրը: Վարչապետն ու ԱՀ նախագահը ընկերութեան ղեկավարներու ուղեկցութեամբ շրջայց կատարած են համալիրէն ներս, ծանօթացած իրականացուող աշխատանքներուն, ընկերութեան գործունէութեան ու առաջիկայ ծրագիրներուն: Այս մասին կը տեղեկացնէ վարչապետ Փաշինեանի աշխատակազմը։
Նշուած է, որ «Պէյս Մեթըլս»-ը կը հանդիսանայ Արցախի ամէնէն խոշոր արտադրական միաւորումներէն մէկը, որու գործունէութեամբ շարք մը ոլորտներէ ներս կ'իրականացուին նաեւ տարբեր ծրագիրներ: Եւ որ արտադրութիւնը կ'իրականացուի բնապահպանական արդի չափանիշներուն համապատասխան արդիւնաբերական սարքաւորումներով:
Շրջայցի աւարտին տեղի ունեցած խորհրդակցութեան ընթացքին, ընկերութեան ղեկավարները մանրամասնօրէն անդրադարձած են հանքանիւթի արտադրութեան գործընթացին եւ արդիւնաբերութեան ոլորտէն ներս ընկերութեան զարգացման հեռանկարներուն:
