22.09c
Երեվան
շբթ, մյս 09
Լիբանանի նորանշանակ վարչապետ Հասսան Տիապի նոր կազմելիք կառավարութեան հայ անդամին անունը շուտով պիտի յայտարարուի։
Այս մասին «Արեւելք» տեղեկութիւն ստացաւ Պէյրութէն։
Մեր ունեցած տուեալներով, ՀՅԴ-ի կողմէ առաջադրուելիք նախարարը հայուհի մըն է, որուն անունը պիտի յայտարարուի առաջիկայ օրերուն։
Կը նշուի նաեւ, որ ՀՅԴ-ի կողմէ առաջադրուելիք նախարարուհին շատ հաւանաբար ստանձնէ մշակոյթի եւ տեղեկատւութեան նախարարի պաշտօնը եւ կազմուելիք կառավարութեան մէջ, որ պիտի բաղկանայ 18 նախարարներէ, հայութիւնը պիտի ներկայացուի մէկ նախարարով, իսկ նախկին 30 անդամներէ բաղկացող կառավարութեան մէջ հայութիւնը ներկայացուած էր երկու նախարարներով. մինչ ՀՅԴ-ն ներկայացնող Աւետիս Կիտանեան ստանձնած էր զբօսաշրջութեան նախարարի պաշտօն, իսկ Ռիշար Գույումճեան (որ կը ներկայացնէր «Լիբանանեան ուժեր» կուսակցութիւնը) կը վարէր Ընկերային հարցերու նախարարի պաշտօն։
Ըստ լիբանանեան լրասփիւռներու, նոր կառավարութեան կազմութիւնը օրերու հարց է եւ այդ մասին աւելի վաղ կարճ յայտարարութիւն մը կատարած էր երկրի նախագահ զօր. Միշէլ Աունը։
