30.24c
Երեվան
ուրբ, հնս 19
Լիբանանի վարչապետ Սաատ Հարիրի Փարիզէն վերադարձած է գրեթէ ձեռնունայն։ Այս մասին վերլուծումներ կը կատարեն Լիբանանի տնտեսական խնդիրներուն մասին նիւթեր հրապարակող մասնագէտներ։
Խնդիրն այն է, որ Հարիրի Փարիզ մեկնած էր նախագահ Մաքրոն «նոր վստահեցումներ» ստանալու միտումով, որոնց հիմքով ալ Լիբանանի համար նախատեսուած եւ «Սէտր» անունը կրող տնտեսական ֆորում-սնտուկը ընթացք պիտի առնէր, սակայն նախնական տուեալներու հիմամբ Մաքրոն խօսած է Լիբանանի մէջ սպասուած տնտեսական բարենորոգումներու իրականացման մասին, որոնցմէ ետք է միայն, որ «Սէտր»ը ընթացք պիտի առնէ։
Իր կարգին լիբանանցի յայտնի տնտեսագէտ Փիէռ Խուրի նշած է, որ մասնաւորապէս այս հանգրուանին, երբ Լիբանան յայտնուած է տնտեսական բաւական ծանր ճնշումներու տակ Լիբանանի համար «Սէտր» համաժողով- սնտուկի առաջացումը կը համարուի փրկութեան հիմնական լծակ։
Տնտեսագէտը նաեւ կարծիք յայտնած է, որ Միացեալ Նահանգներու կողմէ Լիբանանի դէմ նախատեսուած տնտեսական ճնշումները հետզհետէ պիտի ուժեղացուին ու չի բացառուիր, որ ԱՄՆ տարբեր տեսակի նոր պատժամիջոցներ տնօրինէ մասնաւորապէս Լիբանանի տնտեսական-ելեւմտական ոլորտներուն դէմ։
Չի բացառուիր նաեւ, որ Մաքրոնի Լիբանանէն ու անոր վարչապետէն արագ բարեկարգումներ պահանջելու մօտեցումը կապ ունին սիւննի աշխարհէն եկող շեշտադրումներու հետ, որովհետեւ ըստ նախնական տուեալներու Սէուտական Արաբիա, ոչ մէկ կերպ պատրաստ է նիւթական նոր յատկացումներ Լիբանանին եւ անշուշտ այդ մօտեցումին հիմնական պատրուակը «Հըզպալլա»ի եւ անոր առաջնորդ ՝Սէյիտ Հասան Նասրալլային կողմէ Սէուտական Արաբիոյ դէմ հնչած մօտեցումներն են։
Ի դէպ կայ նաեւ տեսակէտ, որ Վարչապետ Հարիրիի կառավարութեան տրուած են վեց ամիսներ ամբողջական բարեկարգումներ իրականացնելու համար, այլապէս Լիբանանի տնտեսական իրավիճակը աւելիով պիտի վատթարանայ։
