19.09c
Երեվան
երկ, սպտ 21
Վրէժուհի Պետրոսեան Արմենեան՝ ազգային եւ համայնքային կեանքին նուիրուած կեանք մը
«Արեւելք»ը խոր ցաւով տեղեկացաւ Վրէժուհի Պետրոսեան Արմէնեանի մահուան մասին։
Այս ծանր կորուստին առիթով, մեր խորին վշտակցութիւնը կը յայտնենք ՀՅԴ հանրածանօթ գործիչ եւ ազգային կեանքի նուիրեալ դէմքերէն Կարօ Արմէնեանին, իր զաւակներուն, թոռներուն եւ ամբողջ ընտանիքին։
Վրէժուհի Պետրոսեան Արմէնեան ծնած էր 1938 թուականի Յունիս 2-ին, Պաղեստինի Եաֆա քաղաքը։ Ան դուստրն էր Կիլիկիոյ Վահկա քաղաքէն Պետրոս Պետրոսեանի եւ Կիլիկիոյ մայրաքաղաք Սիսէն՝ Լուսիա Քուզույեան Պետրոսեանի։
Իր ծնողները, դեռ մատաղ տարիքին, անցած էին Հայոց Ցեղասպանութեան արհաւիրքներէն։ Ապա, որպէս նորակազմ ընտանիք, անոնք վերապրած էին նաեւ 1921-1922 թուականներու Կիլիկիոյ քեմալական բռնութիւններն ու տեղահանութիւնը՝ ի վերջոյ հաստատուելով Պաղեստինի Եաֆա քաղաքը։
Վրէժուհիի մանկութեան առաջին տարիները անցած էին Եաֆայի հայոց Ս. Նիկողայոս վանքի ազգային վարժարանին մէջ։ Սակայն 1948-ին Եաֆայի հայ համայնքը եւս ստիպուած եղաւ դիմագրաւելու բռնագաղթի դաժան հետեւանքները։ Քաղաքի պաղեստինցի բնակչութեան զանգուածային տեղահանութեան պայմաններուն մէջ, Պետրոսեաններու ընտանիքը հեռացաւ Եաֆայէն եւ հաստատուեցաւ Պէյրութ՝ իր կեանքը վերստին կառուցելու համար։
Պէյրութի մէջ Վրէժուհին իր ուսումը շարունակեց Համազգայինի Նշան Փալանճեան Ճեմարանին մէջ։ Ան աշակերտեց հայ կեանքի բազմաթիւ երախտաւոր ուսուցիչներու, որոնց շարքին՝ Սիմոն Վրացեանի, Կարօ Սասունիի, Գառնիկ Կիւզէլեանի, Մուշեղ Իշխանի, Գառնիկ Բանեանի, Եոլանտ Աճեմեանի, Անթուան Քեհեայեանի, Բարսեղ Կանաչեանի, Գառնիկ Թօփալեանի եւ Ալիս Գազանճեանի։
1956-ին, իր ընտանիքին հետ, հաստատուեցաւ Ֆիլատելֆիա, ուր շարունակեց իր ուսումը։ 1962-ին ամուսնացաւ իր ճեմարանական ընկերոջ՝ Կարօ Արմենեանի հետ։ Ընտանիքը բախտաւորուեցաւ չորս զաւակներով եւ ութ թոռներով։
Ընտանեկան պարտականութիւններուն զուգահեռ, Վրէժուհի Պետրոսեան Արմենեան իր ժամանակն ու ուժերը նուիրեց նաեւ հայ համայնքային կեանքին։ Ան գործօն մասնակցութիւն բերաւ Արեւելեան Ամերիկայի հայութեան կազմակերպական աշխատանքներուն՝ անդամակցելով Հայ Երիտասարդաց Դաշնակցութեան, Հայ Օգնութեան Միութեան, Համազգայինի եւ ՀՄԸՄ-ի։
Ան իր կարեւոր ներդրումն ունեցաւ նաեւ հայեցի դաստիարակութեան գործին՝ աջակցելով շրջանի հայկական եկեղեցիներու հովանիին տակ գործող միօրեայ վարժարաններուն եւ յատկապէս Ուաշինկթընի Ս. Խաչ եկեղեցւոյ Համաստեղ Հայ Վարժարանին։
Վրէժուհին հետեւողականօրէն մասնակցեցաւ նաեւ Ուաշինկթընի մէջ Հայ Դատի ցուցական եւ քարոզչական աշխատանքներուն՝ իր նպաստը բերելով ազգային իրաւունքներու պաշտպանութեան եւ հայութեան ձայնի լսելի դարձնելու ջանքերուն։
Անոր կեանքը կը ներկայացնէր ընտանիքի հանդէպ նուիրումի, հայեցի դաստիարակութեան եւ համայնքային ծառայութեան ներդաշնակ ամբողջութիւն մը։ Եաֆայէն Պէյրութ եւ ապա Ֆիլատելֆիա՝ ան իր ապրած բոլոր հանգրուաններուն պահպանեց հայ ինքնութեան եւ ազգային պատկանելիութեան գիտակցութիւնը։
Վրէժուհի Պետրոսեան Արմէնեան մահացած է Երկուշաբթի, 13 Սեպտեմբեր 2026-ին՝ 88 տարեկանին։
Յուղարկաւորութեան կարգը
Հանգուցեալին յուղարկաւորութեան կարգը տեղի պիտի ունենայ Երկուշաբթի, 21 Սեպտեմբեր 2026-ին, կէսօրէ ետք ժամը 1:00-ին, Ֆիլատելֆիոյ Ս. Գրիգոր Լուսաւորիչ եկեղեցւոյ մէջ։ Թաղմանական կարգը պիտի կատարուի Տրեքսըլ Հիլի Արլինկթըն գերեզմանատան մէջ (Arlington Cemetery, Drexel Hill, Pennsylvania)։
Ցաւակցութիւնները պիտի ընդունուին յուղարկաւորութեան վայրին մէջ։
Փոխան ծաղկեպսակի նուիրատուութիւնները կարելի է կատարել հետեւեալ հաստատութիւններուն.
• Soorp Khatch Armenian Apostolic Church — Bethesda, Maryland։
• St. Gregory The Illuminator Armenian Apostolic Church — Philadelphia, Pennsylvania։ Նուիրատուութեան ձեւին մէջ ընտրել «In lieu of flowers»։
• ANCA Endowment Fund — Washington, D.C.։
• Armenian Relief Society Washington Satenig Chapter — Bethesda, Maryland։
