11.09c
Երեվան
շբթ, հկտ 31
Մեսրոպեանական ըլլալ կը նշանակէ ոչ միայն լաւ սորվիլ եւ յաջողութիւններ արձանագրել, այլեւ սիրել մեր լեզուն, ճանչնալ մեր պատմութիւնը եւ հպարտանալ մեր ինքնութեամբ։
Միշտ յիշեցէ՛ք, որ կարելի է սորվիլ բազմաթիւ լեզուներ, տիրապետել նորագոյն արհեստագիտութիւններուն, բացուիլ աշխարհին եւ մեծ յաջողութիւններու հասնիլ՝ առանց մոռնալու մեր մայրենի լեզուն եւ մեր արմատները։
Հայերէնը միայն դպրոցական դասանիւթ մը չէ։ Ան մեր ինքնութեան արտայայտութիւնն է, մեր պատմութեան կենդանի վկան եւ այն անտեսանելի կապը, որ մեզ կը միացնէ մեր նախնիներուն ու աշխարհի չորս ծագերուն ապրող հայութեան։
Մեսրոպեան վարժարանի տնօրէն պարոն Կրէկուար Գալուստի պատգամը՝ Սրբոց Թարգմանչաց տօնին առիթով.
«Սիրելի՛ Մեսրոպեանականներ,
Այսօր կը տօնենք մեր ժողովուրդի պատմութեան ամէնէն լուսաւոր տօներէն մէկը՝ Սուրբ Թարգմանչաց տօնը։
Աւելի քան 1600 տարի առաջ, Սուրբ Մեսրոպ Մաշտոց, Սահակ Պարթեւ Կաթողիկոսի գործակցութեամբ, ստեղծեց հայոց գիրերը եւ նոր էջ մը բացաւ մեր ժողովուրդի պատմութեան մէջ։
Հայոց գիրերու գիւտը պարզապէս այբուբենի մը ստեղծումը չէր։ Ան ազգային ու մշակութային վերածնունդի մը սկիզբն էր, որ մեր ժողովուրդին տուաւ իր մայրենի լեզուով մտածելու, գրելու, աղօթելու եւ իր ինքնութիւնը պահպանելու ուժը։
Սիրելի՛ աշակերտներ,
Այսօր, երբ աշխարհը արագօրէն կը փոխուի, երբ արհեստագիտութիւնն ու արհեստական բանականութիւնը նոր հորիզոններ կը բանան մեր առջեւ, մեր մայրենի լեզուին եւ ազգային արժէքներուն պահպանումը աւելի քան երբեք կարեւոր կը դառնայ։
Դուք առանձնաշնորհումը ունիք յաճախելու Սուրբ Մեսրոպ Մաշտոցի անունը կրող վարժարան մը։ Սակայն այդ անունը պատիւ ըլլալու կողքին նաեւ պատասխանատուութիւն մըն է։
Մեսրոպեանական ըլլալ կը նշանակէ ոչ միայն լաւ սորվիլ եւ յաջողութիւններ արձանագրել, այլեւ սիրել մեր լեզուն, ճանչնալ մեր պատմութիւնը եւ հպարտանալ մեր ինքնութեամբ։
Միշտ յիշեցէ՛ք, որ կարելի է սորվիլ բազմաթիւ լեզուներ, տիրապետել նորագոյն արհեստագիտութիւններուն, բացուիլ աշխարհին եւ մեծ յաջողութիւններու հասնիլ՝ առանց մոռնալու մեր մայրենի լեզուն եւ մեր արմատները։
Հայերէնը միայն դպրոցական դասանիւթ մը չէ։ Ան մեր ինքնութեան արտայայտութիւնն է, մեր պատմութեան կենդանի վկան եւ այն անտեսանելի կապը, որ մեզ կը միացնէ մեր նախնիներուն ու աշխարհի չորս ծագերուն ապրող հայութեան։
Սիրելի՛ Մեսրոպեանականներ,
Այսօրուան պատգամը առաջին հերթին ձեզի՛ ուղղուած է։
Դուք էք վաղուան հայերէնով մտածողները, ստեղծագործողները, գրողները, գիտնականներն ու նորարարները։
Մի՛ բաւարարուիք միայն ձեզի փոխանցուած ժառանգութիւնը պահպանելով։ Ձգտեցէ՛ք զայն հարստացնելու ձեր գիտելիքներով, գաղափարներով եւ ստեղծագործութեամբ։
Մի՛ վախնաք նոր գաղափարներ արտայայտելէ, նոր ուղիներ որոնելէ եւ հայերէնով նոր հորիզոններ բացայայտելէ։
Յիշեցէ՛ք, որ Սուրբ Թարգմանիչներն ալ իրենց ժամանակի մեծ նորարարներն էին։ Անոնք համարձակութիւնը ունեցան իրենց ժողովուրդին առջեւ բանալու գիտելիքի, հաւատքի եւ իմաստութեան նոր դռներ։
Այսօր այդ նոյն համարձակութիւնն ու ստեղծագործ ոգին ձեզմէ կը սպասուին։
Որովհետեւ Սուրբ Թարգմանիչներուն իսկական ժառանգորդը ան չէ, որ միայն կը հիանայ անոնց գործով, այլ ան՝ որ կը շարունակէ եւ կը հարստացնէ զայն։
Ուստի, այսօր ձեզի ուղղուած պատգամս պարզ է.
Սիրեցէ՛ք հայերէնը, խօսեցէ՛ք հայերէն, կարդացէ՛ք հայերէն, աղօթեցէ՛ք հայերէն եւ հպարտ եղէ՛ք ձեր հայկական ինքնութեամբ։
Եղէ՛ք հետաքրքրասէր, աշխատասէր, ստեղծագործ եւ բաց՝ նոր գիտելիքներու ու նոր գաղափարներու առջեւ։ Բայց ուր ալ երթաք եւ ինչ յաջողութիւններու ալ հասնիք, մի՛ մոռնաք ձեր արմատները։
Յիշեցէ՛ք, որ մեր ժողովուրդին ապագան նաեւ ձեր ձեռքերուն մէջ է, եւ դուք էք, որ պիտի շարունակէք Սուրբ Մեսրոպ Մաշտոցի եւ Սուրբ Թարգմանիչներուն սկսած մեծ առաքելութիւնը։
Թող հայ գիրը լուսաւորէ ձեր միտքերը, հայ լեզուն միշտ հնչէ ձեր շրթներուն վրայ, իսկ մեր հաւատքն ու մշակոյթը անխախտ մնան ձեր սրտերուն մէջ։
Շնորհաւո՛ր Սուրբ Թարգմանչաց տօնը։
Կեցցէ՛ հայ գիրը, կեցցէ՛ հայ լեզուն, կեցցէ՛ հայ դպրոցը եւ կեցցէ՛ Մեսրոպեանը»։
