30.3c
Երեվան
չրք, հլս 15
«Իրապէս սուփերվարչապետական համակարգը օրէնսդրութեան առումով արդէն ստեղծուած է, եւ ես միանշանակ յանձնառու եմ համարում ինձ այդ խնդիրը շտկելու եւ իշխանութիւնը հաւասարակշռուած դարձնելու հարցում», - յայտարարեց Հայաստանի վարչապետի թեկնածու Նիկոլ Փաշինեանը՝ այսօր Ազգային ժողովի մէջ պատասխանելով «Բարգաւաճ Հայաստան» խմբակցութեան պատգամաւոր Շաքէ Իսայեանի հարցին:
«Որովհետեւ երբ որ ես ասում եմ, որ պէտք է փակենք այն էջը, երբ կառավարութիւնը ինչ-որ բան պարտադրում է, դա պէտք է փակենք ոչ միայն յոյս ունենալով, որ գործող սուփերվարչապետը էդպիսի բան չի անի, այլեւ ստեղծելով համապատասխան մեխանիզմներ, որ նոյնիսկ ցանկութեան դէպքում հնարաւոր չլինի այդպէս վարուել», - ընդգծեց վարչապետի թեկնածուն:
Անոր խօսքով՝ միանշանակ է, որ Ոստիկանութիւնը եւ Ազգային անվտանգութեան ծառայութիւնը պէտք է փոխեն իրենց կարգավիճակը եւ դառնան նախարարութիւններ: «Իհարկէ, սրա համար կան որոշակի օրէնսդրական, եւ հնարաւոր է՝ նաեւ սահմանադրական դժուարութիւններ, բայց դրանք յաղթահարելի դժուարութիւններ են», - նշեց Փաշինեանը:
Ան հաստատեց, որ իր կարծիքով՝ «չափից աւելի լիազօրութիւններ են կեդրոնացուած վարչապետի ձեռքում, եւ ընդհակառակը՝ այլ պետական ինստիտուտներից ամօթի աստիճան վերցուած են լիազօրութիւններ»:
«Մասնաւորապէս, ես կարծում եմ, որ այն պարագան, երբ նախագահի ինստիտուտից ըստ էութեան վերցուել են բոլոր հնարաւոր գործառոյթները եւ նրան վերապահել օֆիսային աշխատողի կարգավիճակ, դա ուղղակի խփում է Հայաստանի Հանրապետութեան պետութեան հեղինակութեանը: Եւ այո, ես յանձնառու եմ, էլ ի՞նչ իմաստ կ'ունենան փոփոխութիւնները, եթէ մենք քննադատելով ինչ-որ երեւոյթներ՝ հասնենք իշխանութեան եւ ինքներս մեր հերթին սկսենք կիրառել այդ լծակները», - յայտարարեց ընդդիմադիր գործիչը:
«Ես Ձեզ հաւաստիացնում եմ, որ մենք բաւարար յարգանք ունենք մեր անցած ճանապարհի նկատմամբ, մեր ժողովրդի նկատմամբ, որպէսզի Ձեր ասած բոլոր հարցերը լուծենք: Որ սուփերվարչապետական համակարգը պէտք է գոյութիւն չունենայ, պէտք է գոյութիւն ունենայ նորմալ խորհրդարանական, առնուազն էս պահին, կառավարման համակարգ, դա, կարծում եմ, աներկբայ է եւ բխում է մեր երկրի շահերից», - ըսաւ Փաշինեանը:
