33.25c
Երեվան
չրք, հլս 15
ԱԺ «ՀՀԿ» խմբակցութեան ղեկավար Վահրամ Պաղտասարեանը քիչ առաջ լրագրողներու հետ զրոյցի ժամանակ յայտարարեց, որ Հայաստանի Հանրապետութիւնը 8 մայիսին պիտի ունենայ վարչապետ, իսկ ՀՀԿ-ն պիտի աջակցի Խորհրդարանի 1/3-ի կողմէ առաջադրուած թեկնածուին:
ԱԺ «ՀՀԿ» խմբակցութեան յայտարարութիւնը կը ներկայացնենք ստորեւ:
«Մենք դրական ենք գնահատում փաստը, որ Ազգային ժողովի քննարկումներում խորհրդարանական չորս խմբակցութիւնների կողմից հնչեցին առկայ գրեթէ բոլոր մտահոգութիւնները, որոնք կան երկրում ստեղծուած իրավիճակը հանգուցալուծելու տեսանկիւնից: Հանրապետականի կողմից հնչեցուած մտահոգութիւնների մի մասը վարչապետի թեկնածուի հետ հարցուպատասխանի ընթացքում փարատուեց, բայց ամենակարեւորները դեռ մնացել են անպատասխան: Այդ հարցերն անկիւնաքարային են ոչ թէ Հանրապետական կուսակցութեան, այլ մեր երկրի հենց վաղուայ համար:
Հանրապետականը լուռ ու անպատասխան իր վրայ վերցրեց մեղադրանքները, որոնք իր հետ իրականում քիչ կապ ունէին:
Վերցրեց յանուն երկրի, յանուն վաղուայ` յոյսով, որ ովքեր պէտք է ընկալէին, ընկալեցին մեր ասելիքը:
Այժմ, հաշուի առնելով երկրին անյապաղ կայուն ընթացք վերադարձնելու հրամայականը, ի գիտութիւն ընդունելով ս.թ. մայիսի մէկին ՀՀ ԱԺ-ում վարչապետի ընտրութեան գործընթացում հնչած դիրքորոշումներն ու քուէարկութեան արդիւնքները` ՀՀԿ խմբակցութեան անունից յայտարարում եմ.
Հայաստանի Հանրապետութիւնը մայիսի 8-ին ունենալու է սահմանադրական ճանապարհով ընտրուած վարչապետ:
Հայաստանի Հանրապետական կուսակցութիւնը վարչապետի թեկնածու չի առաջադրելու:
Հայաստանի Հանրապետական կուսակցութիւնը խորհրդարանի 1/3-ի կողմից առաջադրուած թեկնածուին աջակցելու է դառնալ վարչապետ:
Կոչ ենք անում անյապաղ վերացնել տիրող անընդունելի վիճակը, բացել մայրաքաղաքի ու հանրապետութեան փողոցներն ու մայրուղիները, շտապ դադարեցնել օդանաւակայանի հերթական շրջափակումը, դադարեցնել անհանդուրժողականութեան քարոզը եւ վերադառնալ սահմանադրական ճանապարհով ենթադրուող անհրաժեշտ գործողութիւնների դաշտ:
Վահրամ Պաղդասարեան
«ՀՀԿ» խմբակցութեան ղեկավար»
