24.09c
Երեվան
երկ, հնս 02
Հալէպի արեւելեան շրջաններուն վրայ իր տիրապետութիւնը տարածելէն ետք Սուրիոյ բանակը նպատակ ունի իր յաղթանակը ամրագրել դէպի Իտլիպ արշաւելով: Այս մասին տեղեկութիւն կը փոխանցէ «Ալ Մայատին» կայանը, որ նաեւ կը գրէ, թէ Հալէպի մարտերը մտած են ճակատագրական փուլ:
Իր կարգին ռուսական «Իզվէստիան», Սուրիոյ բանակի նախկին զօրավարներէն մէկուն յղում ընելով գրած է, թէ լիբանանեան «Հըզպալլա» կազմակերպութիւնը մտադրած է յառաջիկայ օրերուն մասնայատուկ ուժերու յաւելեալ դասակներ Հալէպ ուղղարկել: Թերթը նոյնպէս կը փոխանցէ, թէ Սուրիա գտնուող «Հըզպալլա»ի զինեալներու թիւը կը հասնի 7000-ի իսկ յառաջիկայ օրերուն Հալէպ հասնող զօրքերով պիտի հասնի 12000-ի, որոնք զինուած են արդիական զէնքերով եւ կը համարուին «Հըզպալլա»ի կարեւորագոյն ուժերը ներկայացնող ջիկատներ:
Թերթը կը գրէ, թէ յառաջիկայ օրերուն ու յատկապէս Հըզպալլայի ջոկատներու՝ Հալէպ հասնելէն ետք քաղաքի արեւելեան մասին ճակատագիրը պիտի վճռուի եւ սուրիական բանակը պիտի յաջողի իրականացնել երկար ամիսներէ ի վեր սպասուած այդ շրջանները ընդդիմադիր ահաբեկիչներէ զերծ շրջան մը դարձնելու իր հին-նոր ծրագիրը:
