23.79c
Երեվան
ուրբ, հնս 19
Ծանրագոյն պատերազմի ճիրաններէն դուրս եկած Հալէպ քաղաքը կը շարունակէ դանդաղ, բայց հաստատ քայլերով վերականգնումի իր քայլերը: Այս ծիրին մէջ ուշագրաւ նախաձեռնութեամբ մը հալէպահայ Եսայի Գոզեան նուիրատութիւն մը կատարած է Հալէպի հայկական թաղամասերուն մերձ եղող եւ ծանր վնասներու ենթարկուած Մզկիթի մը, գումար տրամադրելով եւ Մզկիթի պատասխանատու մարմիններուն նուիրելով ձայնային ամբողջ համակարգ մը (միքրոֆոններ):
Այս մասին լուրը տրուած է Հալէպի մասին լուրեր տարածող դիմատետրի էջերէն մին, որ դրուատիքով խօսած է հալէպահայ երիտասարդին նախաձեռնութեան մասին նշելով, որ «Մեր շրջաններու հալէպահայ երիտասարդը ազնուական քայլով մը շրջանի մզկիթը օգտեց ձայնային համակորգով, որպէսզի մեր աղօթքները լսելի դառնան»:
Երկար տարիներու իսլամ-քրիստոնեայ համակեցութեան փայլուն օրինակ հանդիսացող Հալէպ քաղաքը յատկանշական է հայութեան համար: Յատկանշական է նաեւ այն իմաստով, որ Ցեղասպանութենէն ճողոպրած մեր նախահայրերը հոն գրակաբաց ընդունուած են դառնալով այդ պատմական քաղաքի իսլամ հասարակութեան հոգատարութեան եւ ուշադրութեան առարկայ:
Այդ առումով է նաեւ, որ հալէպահայ սերունդներ աճելով ու մեծնալով տարածուած են ամբողջ սփիւռքի մէջ դառնալով արեւմտահայ լեզուի եւ մշակոյթի մշտական դեսպաններն ու լուսատու ջահերը:
