34.17c
Երեվան
կրկ, օգս 02
4 Սեպտեմբերին ՀՀ պաշտպանութեան նախարար Դաւիթ Տօնոյեանը Մոսկուայի մէջ մասնակցած է ԱՊՀ, Շանհաեան համագործակցութեան կազմակերպութեան /ՇՀԿ/ եւ ՀԱՊԿ անդամ պետութիւններու պաշտպանական գերատեսչութիւններու ղեկավարներու համատեղ նիստին: Այս մասին կը յայտնէ ՊՆ մամուլի խօսնակը:
Նիստի բացման խօսքին մէջ ՌԴ պաշտպանութեան նախարար Սերկէյ Շոյկուն նշած է, որ նման ձեւաչափով հանդիպումը առաջինն է եւ վստահութիւն յայտնած է, որ միջազգային ռազմական համագործակցութիւնն այս հանդիպումէն ետք առաւել կ'աշխուժանայ, իսկ նիստի արդիւնքները պիտի նպաստեն գերատեսչութիւններու փոխգործակցութեան խորացման:
ՌԴ ՊՆ մասնագէտները պաշտպանական գերատեսչութիւններու ղեկավարներուն ներկայացուցած են «Քորոնա» ժահրային վարակի դէմ աշխարհի մէջ առաջինը գրանցուած ռուսական պատուաստանիւթի մշակման եւ փորձարկման մանրամասներ:
Նիստի մասնակիցները այցելած են նաեւ մերձմոսկովեան ՌԴ ԶՈՒ Գլխաւոր տաճար եւ «Յիշողութեան ճանապարհ» թանգարանային համալիր:
Դաւիթ Տօնոյեանը «Յիշողութեան ճանապարհ» համալիրի բազմագործօն որոնման համակարգի միջոցով գտած է Հայրենական մեծ պատերազմի մասնակից պապի՝ Յովհաննէս Պօղոսի Յակոբովի մասին փաստեր:
«Յիշողութեան ճանապարհ» թանգարանային համալիրը ստեղծուած է Հայրենական մեծ պատերազմի մասնակից խորհրդային զինուորներու յիշատակը յաւերժացնելու նպատակով: Այժմ այն կը ներառէ 33 միլիոն գրառում եւ լուսանկար:
Նիստի շրջածիրէն ներս ստորագրուած են ԱՊՀ եւ ՀԱՊԿ շրջանակներէն ներս շարք մը փաստաթուղթեր:
