23.79c
Երեվան
ուրբ, հնս 19
Վարչապետ Սաատ Հարիրիի «տունդարձ»էն ետք ընթացք առած փուլը վճռորոշ փուլ պիտի ըլլայ: Խօսքը անշուշտ Հարիրիի ղեկավարած կառավարութեան մասին է, որ այսօր կը գտնուի մահաքունի մը մէջ:
Երկրի նախագահ զօր. Միշէլ Աուն, որ քաղաքական գլխաւոր կուսակցութիւններն ու կողմերը Պաապտայի պալատ հրաւիրած է խորհրդակցելու կանգնած է կարեւոր վճիռներ առնելու անհրաժեշտութեան առջեւ:
Սէուտցիք, որոնք այս տագնապը առաջ բերին կը պահանջեն երկրին մէջ գործող հիմնարար սկզբունքներու վերանայում ու մանաւանդ Լիբանանը չէզոք երկիր դարձնելու ու մօտիկ անցեալին այդ առումով առնուած որոշումներու վերակենդանացում:
Սեղանին դրուած առաջարկը, որուն հանդէպ Սաատ Հարիրին ալ կրնայ որոշ կասկածներ ունենալ կրնայ երկիրը լուրջ տագնապի մը տանիլ, որուն հետեւանքով ալ Պէյրութը կրնայ տնտեսական ամպարկոյի մը առջեւ յայտնուիլ:
Հարիրիի եւ Լիբանանի Ռիատամէտ ուժերուն մեծ մասը (յատկապէս անոնք, որոնք կ'ուզեն դրական ճիգեր գործադրել ու այս տագնապէն դուրս գալ) իրենց մտքերուն մէջ հարցումներ կու տան Ռիատի այս պահանջներուն վերաբերեալ, տրուած ըլլալով որ թէ Սուրիոյ եւ թէ Եէմէնի մէջ Թեհրան եւ անոր մերձ համարուող ուժերէն գլխաւորը համարուող ՝ «Հըզպալլա»ն փայլուն «յաղթանակներ» գրանցած է, հետեւաբար նաեւ ակնյայտ է, որ շիիթ այս միաւորները ոչ կարիք, ոչ ալ ստիպողութիւնն ունի զիջումներու երթալու:
Ամէն պարագայի յստակ է, որ այս քաղաքական լարուածութեան վառուած պատրոյգը մարելու առաջատարը պիտի դառնայ երկրի քրիստոնեաներու շահերը պաշտպանելու կոչուած նախագահ զօր. Միշէլ Աունը, որ նաեւ հետամուտ է գործել, որպէս համայն «լիբանանցիներու հայր»:
