13.09c
Երեվան
երք, մրտ 31
Լիբանանի Հանրապետութեան նախագահ զօր. Միշէլ Աուն, պատկերասփռուած ելոյթ մը ունենալով, այսօր խօսեցաւ երկրի ընդհանուր իրավիճակին մասին։
Աուն իր խօսքին մէջ մասնաւորապէս դիտել տուաւ, որ ինք առանձինն անկարող է երկրի հարցերը լուծել եւ կարիքն ունի բոլորի օգնութեան եւ նեցուկի։ Աուն նշեց, որ ինք պատրաստ է Պաապտայի նախագահական պալատին մէջ ընդունիլ ցուցարարները ներկայացնող պատուիրակութիւն մը՝ անոնց հետ քննարկելու երկրի ընդհանուր վիճակը եւ փորձելու լուծումներ բերել բոլոր հիմնախնդիրներուն։
Ստորեւ Լիբանանի նախագահին այսօր արտասանած խօսքին կարեւոր հատուածները։
«Սիրելի լիբանանցիներ, ես շատ փորձեցի սակայն չկրցայ լուծել երկրի տնտեսական հարցերը։ Այսօր կը յայտարարեմ, որ առանձինս չեմ կրնար պայքարիլ երկրին մէջ բարեփոխումներ իրականցնելու եւ այս առումով ալ կարիքն ունիմ ձեր բոլորի օգնութեան։ Մեզի նոր օրէնքներ են պէտք եւ պէտք է նոր մարմիններ ստեղծուին՝ հաշուի կանչելու համար բոլոր այն անձերը, որոնք կասկածելի են եւ կատարած են դրամական մեծ չարաշահումներ։
Գիտեմ, որ այսօր մեծ անվստահութիւն ունիք երկրի բոլոր մարմիններուն եւ կուսակցութիւններուն հանդէպ, սակայն կը վստահեցնեմ, որ օրեր առաջ ներկայացուած բարեփոխումներու փաթեթը կարեւոր սրբագրում պիտի դառնայ մեր երկրի խնդիրներու լուծման ճանապարհին։
Մեզի պէտք են այնպիսի հիմնաւոր օրէնքներ, որոնց ճամբով կարելի պիտի ըլլայ պատասխանատւութեան կանչել բոլոր յանցագործները։
Ու թոյլ տուէք ըսել, որ այս բոլորին մասին անկեղծօրէն խօսելու համար ես պատրաստ եմ ընդունիլ ցուցարարները ներկայացնող պատուիրակութիւն մը, անոնց հետ քննարկելու բոլոր հիմնախնդիրները։ Ցոյց կատարելը ձեր արդար իրաւունքն է, սակայն նաեւ չմոռնանք, որ ազատ տեղաշարժուելու իրաւունքն ալ բոլորի արդար իրաւունքն է։
Փողոցներու մէջ անհնար է համակարգերը փոխել եւ փոփոխութիւնը կը կատարուի բացառապէս սահմանադրական իրաւասու մարմիններուն ընդմէջէն։
Մենք մտավախութիւններ ունինք, որ երկրի տնտեսական ամբողջ համակարգը կրնայ փլուզիլ ու մենք բոլորս յայտնուինք մեծ քաոսի մը առջեւ, ու ատկէ հեռու մնալու համար մենք պարտաւոր ենք բոլորս միասին աշխատիլ»։
