18.09c
Երեվան
չրք, մյս 06
Լիբանանի առողջապահութեան նախարար Համատ Հասանի վկայութեամբ, երկրին մէջ «Քորոնա»ի վարակը մտած է նոր տարածման փուլ մը, որ կրնայ համատարած համաճարակի վերածուիլ։
Նախարարը, որ խօսած է ընդհանուր իրավիճակին մասին նաեւ նշած է, որ դիմած է Լիբանանի առողջապահական ոլորտի բոլոր հաստատութիւններուն եւ գործիչներուն եւ անոնցմէ պահանջած առաւելագոյնի հասցնել «Քորոնա»ի դէմ պայքարի համար ձեռք առնուող միջոցառումները։
Նշենք, որ լիբանանցի նախարարը մեծ զարմանք արտայայտած է այն պատճառով, որ երէկ Լիբանանի մէջ յայտնաբերուած են «Քորոնա» վարակի կրող անձեր, որոնք չեն շփուած հիւանդներու հետ, եւ այցելած են այնպիսի երկիրներ, ուր վարակը շատ տարածուած չէ, իսկ կայ պարագայ մը, որ վերջերս Լիբանանէն դուրս չէ եկած, ուսուցիչ է եւ անոր շփումը սահմանափակուած եղած է բացառապէս իր գործընկերներուն հետ։
Այս երեւոյթներն են, որ մեծ մտավախութիւններ առթած են Լիբանանի առողջապահութեան նախարարին, որ նաեւ հաստատած է, թէ վարակը մտած է արագ տարածման վտանգաւոր եւ մտահոգիչ փուլը։
Յիշեցնենք, որ այսօրուան կտրուածքով Լիբանանի մէջ կան 22 վարակակիրներ, որոնց 6 -ը հիւանդացած են երէկ։
Այս բոլորի լոյսին տակ Լիբանանի մարմիններ հետամուտ են պայքարի կարեւոր միջոցներ գործադրել պայքարելու համար «Քորոնա» վարակի տարածման դէմ։
