Թուրքիա «Պայրաքտար» պիտի արտադրէ Ուքրանիոյ մէջ

Թուրքիա «Պայրաքտար» պիտի արտադրէ Ուքրանիոյ մէջ

Bayraktar Kizilelma ռէաքթիւ (հակազդեցիկ) գերձայնային անօդաչու թռչող սարքի նոր մոտելը կրնայ արտադրուիլ այն գործարանին մէջ, որ թրքական Baykar Makina ընկերութիւնը կը կառուցէ Ուքրանիոյ մէջ։ Այս մասին յայտարարած է ընկերութեան գլխաւոր տնօրէն Հալուք Պայրաքտարը, կը հաղորդէ «ՈւՆԻԱՆ»-ը։

Ան պատմած է, որ ընկերութիւնը կ'ակնկալէ Ուքրանիոյ իր գործարանին մէջ, Bayraktar TB2 եւ Bayraktar Akinci անօդաչու սարքերէն բացի, արտադրել նաեւ նոր Bayraktar Kizilelma անօդաչու թռչող սարքը։

16 Մարտին թրքական ընկերութիւնը սկսած էր իր առաջին անօդաչու թռչող սարքի՝ MIUS կործանիչի (Muharip Insansiz Ucak Sistemi - Unmanned Combat Aircraft System) նախատիպի հաւաքումը։ Այն նաեւ Kizilelma կը կոչուի։ Անոր առաջին թռիչքը նախատեսուած է 2023 թ. Ընդ որում, այդ սարքերու համար AI-322F շարժիչի մատակարարը, 2021 թ. նոյեմբերին կնքուած պայմանագրի համաձայն, ուքրանական «Իւչենկօ-փրոկրես» պետական ​​ձեռնարկութիւնը:

Գլխաւոր տնօրէնը նաեւ յայտնած է, որ ընկերութիւնն արդէն սկսած է թրքական Bayraktar ԱԹՍ-ներու արտադրութեան գործարանի կառուցումը։

Յիշեցնենք, որ Թուրքիոյ նախագահ Ռեճէպ Թայէպ Էրտողան 3 փետրուարին այցելած էր Քիեւ։ Անոր այցի ընթացքին ութ միջպետական ​​փաստաթուղթ ստորագրուած էր, այդ շարքին՝ բարձր արհեսատգիտութիւններու, օդային եւ տիեզերական ոլորտի մէջ համագործակցութեան մասին, որոնք թոյլ կու տան Ուքրանիոյ մէջ Bayraktar-ի արտադրութեան եւ սպասարկման գործարան կառուցել։ 19 Յուլիսին Ուքրանիոյ նախարարներու գրասենեակը հաւանութիւն տուած էր Թուրքիոյ հետ համաձայնագրի վաւերացման օրինագիծին։ 8 Օգոստոսին Թուրքիոյ մէջ Ուքրանիոյ դեսպան Վասիլի Պոտնարը յայտնած էր, որ Baykar Makina-ն Ուքրանիոյ մէջ հողատարածք գնած է գործարանի կառուցման համար։