-4.91c
Երեվան
կրկ, դկտ 22
Հակառակ Լիբանանը հարուածի տակ դրած իսրայէլեան պատերազմին Պէյրութի Հայ Կաթողիկէ Վարժարանը առաջնորդութեամբ վարժարանի ժրաջան տնօրէն՝ Տիար Կրէկուար Գալուստին ամառնային դադարէն ետք վերաբացած է իր դռները։
Ասոր մասին «Արեւելք» տեղեկութիւն ստացաւ Մեսրոպեան Վարժարանի ցանցային խումբէն։
Ստորեւ վերամուտին մասին ներկայացուած լրատւութիւնը։
9 Հոկտեմբեր 2024-ին, Հայ Կաթողիկէ Մեսրոպեան Բարձրագոյն Վարժարանը վերաբացաւ իր դռները աշակերտներուն առջեւ, յաղթահարելով պատերազմական իրադրութեան պարտադրած վերամուտի ստիպողական յետաձգումը:
Վերամուտի այս յատուկ օրը նշուեցաւ հանդիսաւոր արարողութեամբ մը, որուն ընթացքին արտասանած իր խօսքին մէջ վարժարանի տնօրէն պրն. Կրկէուար Գալուստ ընդգծեց կրթութեան կարեւորութիւնը, յատկապէս ճգնաժամային այս շրջանին: Ան նշեց, որ ամենադժուար պայմաններուն մէջ իսկ, կրթութիւնը եղած է ընկերութեան զօրութեան եւ յարատեւման աղբիւրը: «Այսօր, աւելի քան երբեք, մենք պարտաւոր ենք շարունակել մեր առաքելութիւնը՝ կրթելու եւ դաստիարակելու մեր երիտասարդ սերունդը», ըսաւ ան:
Սուրբ Փրկիչ եկեղեցւոյ ժողովրդապետ Հայր Սահակ Քէշիշեան իր կարգին շեշտեց հաւատքի եւ յոյսի կարեւորութիւնը այս դժուարին ժամանակներուն: «Մեր հաւատքը կը զօրացնէ մեզ դիմակայելու բոլոր մարտահրաւէրները: Այս դպրոցը ոչ միայն գիտելիքի, այլ նաեւ հոգեւոր արժէքներու փարոս մըն է, որ պիտի առաջնորդէ մեր աշակերտները դէպի պայծառ ապագայ», ըսաւ ան:
Չնայած տիրող անկայուն կացութեան, Մեսրոպեան վարժարանը ձեռնարկած է բոլոր անհրաժեշտ միջոցառումները՝ ապահովելու համար ուսումնառութեան բնականոն ընթացքը:
Մեսրոպեան վարժարանի վերամուտը կը հանդիսանայ յոյսի եւ տոկունութեան խորհրդանիշ մը ողջ լիբանանահայ համայնքին համար, ցոյց տալով թէ կրթութիւնը կը մնայ գերակայ արժէք՝ նոյնիսկ ամենադժուարին պայմաններուն տակ:
