13.09c
Երեվան
երկ, հնս 01
Եւրոպան պիտի աջակցի Հայաստանին՝ Եւրոպական Միութեան անդամ դառնալու անոր ձգտումներուն մէջ, ըսած է Եւրոպական Միութեան ընդլայնման հարցերով յանձնակատար Մարթա Քոսը՝ մեկնաբանելով Հայաստանի եւրոպական համարկման վերաբերեալ վերջին յայտարարութիւնները։ Լրագրողներու հետ զրոյցի տեսանիւթը տարածած է Եւրոպական Միութեան արտաքին գործոց խորհուրդը։
«Միայն Հայաստանի ժողովուրդը կրնայ որոշել իր ապագան։ Եւրոպական քաղաքական համայնքի վերջին հանդիպումը, ինչպէս նաեւ ԵՄ-Հայաստան գագաթնաժողովը ցոյց տուին այն ուղին, որով անոնք կ՚ուզեն երթալ, եւ Եւրոպան պիտի աջակցի անոնց»,- ըսած է Քոսը։
Ան աւելցուցած է, որ Եւրոպան տեղեակ է տարածաշրջանին մէջ աշխարհաքաղաքական զարգացումներուն եւ ուշադրութեամբ պիտի հետեւի անոնց։
Աւելի վաղ Ռուսիոյ նախագահ Վլատիմիր Փութին յայտարարած էր, որ առաջարկած է ԵԱՏՄ-ի յաջորդ գագաթաժողովի ընթացքին քննարկել Եւրոպական Միութեան հետ կապուած Հայաստանի ծրագիրները։ Ապրիլ 1-ին Մոսկուայի մէջ Հայաստանի վարչապետ Նիկոլ Փաշինեանի հետ հանդիպման ընթացքին Փութին նշած էր, որ անկարելի է միաժամանակ գտնուիլ թէ՛ ԵՄ-ի եւ թէ՛ ԵԱՏՄ-ի մաքսային միութեան մէջ։
