16.09c
Երեվան
շբթ, ապր 18
«Արեւելք» կրկին հետաքրքրուելով Արցախի Աղաւնօ գիւղի մասին, որուն կարգավիճակը պատերազմէն ետք տակաւին յստակ չէ, կապ հաստատեց Աղաւնոյի գիւղապետ, հայրենադարձ, ՀՅԴ անդամ՝ Անդրանիկ Չաւուշեանի հետ:
Չաւուշեան մատնանշեց, թէ ո՛չ վարչապետը, ո՛չ ռուսները եւ ո՛չ ատրպէճանցիները կրնան որոշել, որ այն հողերը, ուր հայը ապրած է դարէ դար, կը մտնեն ատրպէյճանական կազմին մէջ:
Ըստ գիւղապետին, ազգի զաւակն է, որ իր ազգային արժէքները հայկական պիտի պահպանէ, որքան որ ռուսական կողմը ստանձնէ պաշտպանութիւնը,- «Ներկայիս, երեւոյթը այնպէս է, որ ռուս խաղաղապահները կը պաշտպանեն, բայց որեւէ ատեն անոնք կրնան չընել այդ, հետեւաբար մեր յոյսը միշտ մեր վրան պէտք է դնենք, Աստուծոյ օգնութեամբ»:
Գիւղապետը ափսոսալով ընդգծեց, «Ես չեմ հաշտուիր այն մտքին հետ, որ այլեւս երկիր չկայ, պիտի ըսենք ժամանակաւոր չկայ, որովհետեւ ետ պիտի վերցնենք մեր բոլոր կորուստները»: Ան աւելցուց թէ անշուշտ այդ միայն հայերուն հետ կապուած չէ, այլ նաեւ միջազգային քաղաքականութեան ու շատ այլ հարցերու հետ: Բայց ըստ Չաւուշեանի ան որ առանց կռիւի կը յանձնէ, չի կրնար պահել այդ սարերը,- «Այս սարերուն տէրն ու տիրականը հայն է, հայը միայն կրնայ անոնց լեզուէն հասկնալ»: Եւ եթէ երկիր չմնայ ալ ինչ գիւղապետի, մարզպետի կամ նախարարի մասին է խօսքը:
Իսկ թէ ինչ կը հաղորդեն պետական մարմինները իրենց գիւղի կարգավիճակի մասին, գիւղապետը կատակելով ըսաւ թէ «աչքիս կը դառնանք «Աղաւնօ պետութիւն»: Պետական մարմինները նոյնիսկ եթէ տիրապետեն տեղեկատուութեան, մեզի լուր չեն տար»: Ան շարունակեց թէ, կ'ուզէ լսել միայն յաղթանակի մասին, տարածքներ վերցնելու մասին այլ ոչ թէ լքելու,- «Տհաճ է յանձնուելու մասին լսել, այդ չեմ ընդունիր, թերեւս անոր համար ալ ընդհանրապէս ոչ մէկ բան կը տեղեկացնեն ինծի»:
Աղաւնոյի գիւղապետը եզրափակեց «Հիմա այդ պահն է, որ բոլորս իրար վստահինք որոշ չափով եւ անցնինք գործնականի»:
