18.09c
Երեվան
շբթ, ապր 25
Ինքնութեան պահպանումը եւ հայեցի կրթութեան տարածումը սփիւռքեան պայմաններուն մէջ կը մնան մերօրեայ ամենէն կարեւոր մարտահրաւէրները: Այս ուղիին վրայ, ՀԲԸՄ Հայկական Համացանցային Համալսարանը (ՀՀՀ) կը շարունակէ հանդիսանալ այն հզօր կամուրջը, որ կը միացնէ աշխարհասփիւռ հայութիւնը իր արմատներուն եւ լեզուին:
Հայկական Համացանցային Համալսարանի Մագիստրոսական ծրագիրի փայլուն շրջանաւարտներէն Նանոր Թիւթիւնճեան մէկն է անոնցմէ, որոնք անցած են հպարտանք ներշնչող այդ ուղին։
Ճանապարհ դէպի հայոց լեզուի ակունքները
Նանոր Թիւթիւնճեան ծնած է Հալէպ, Սուրիա: Հայկական ինքնութիւնը միշտ եղած է իր էութեան անբաժան մասը: Ան յաճախած է ՀԲԸՄ-ի Լազար Նաճարեան-Գալուստ Կիւլպէնկեան Կեդրոնական վարժարանը, ուր մեծ թափ առած է իր սէրը հայոց լեզուի եւ մշակոյթի հանդէպ: Թէեւ ան բարձրագոյն ուսումը ստացած է Երեւանի Պետական Բժշկական Համալսարանի Դեղագիտական բաժնէն, սակայն 2012-ին, պատերազմի հետեւանքով, ստիպուած գաղթած եւ հաստատուած է ԱՄՆ:
2023-էն ի վեր Նանորը կը պաշտօնավարէ ԱՄՆ-ի Գաբայեան նախակրթարանէն ներս՝ որպէս հինգերորդ կարգի հայոց լեզուի ուսուցչուհի: Ան լեզուն կը դասաւանդէ հաճելի ու հետաքրքրական մօտեցումով՝ հաւատալով.
«Երբ լեզուն դասաւանդուի սիրով՝ կը դառնայ ինքնութիւն, ոչ թէ միայն առարկայ կամ դասանիւթ»:
Ուսումնառութիւնը՝ առանց սահմաններու
Իր գիտելիքները ամրապնդելու եւ լեզուական հմտութիւնները զարգացնելու նպատակով, Նանորը որոշեց շարունակել կրթութիւնը հայագիտական ոլորտին մէջ: Լայն ուսումնասիրութիւններէ ետք, ան ընտրեց ՀԲԸՄ ՀՀՀ-ի «Լեզուաբանութիւն եւ միջմշակութային հաղորդակցութիւն» մագիստրոսական ծրագիրը:
Ինչո՞ւ յատկապէս ՀԲԸՄ ՀՀՀ-ն. Ըստ Նանորի, այս համալսարանը ամենէն յարմար ընտրութիւնն էր, քանի որ կը կիրարկէ ճարտարագիտութեան նորագոյն միջոցներ եւ կը մատուցէ մատչելի, ճկուն ու արդիական ծրագիրներ:
Դժուարութիւններու յաղթահարումը Ուսման ընթացքին ան դժուարութիւններու չէ հանդիպած՝ շնորհիւ փորձառու մասնագէտներու: Առանձնայատուկ երախտագիտութեամբ կը յիշէ Կրթական բաժինի տնօրէն Մարինէ Խաչատուրեանը, Արեւմտահայերէնի բաժինի համակարգող Զեփիւռ Ղպլիկեանը եւ մագիստրոսական աւարտաճառի ղեկավար դոկտ. Յակոբ Չոլաքեանը, որոնց հոգատար ու պարզ մօտեցումը ուսման ընթացքը դարձուցած է վստահելի եւ ներշնչող:
Առցանց կրթութեան առաւելութիւնները
Նանորը կը շեշտէ, որ առցանց մագիստրոսական ծրագիրը օժտուած է կարեւոր յատկութիւններով՝ ազատութիւն, ճկունութիւն եւ յարմարաւէտութիւն:
«Ծրագիրը շատ գործնական է. կրնաս ազատօրէն տնօրինել ժամանակդ՝ համատեղելով ուսումը աշխատանքային եւ ընտանեկան պարտականութիւններուն հետ»,-կ՚ըսէ Նանոր։
Աւելին, ըստ իրեն, այս ձեւաչափը կը զարգացնէ ինքնակարգապահութիւնը, պատասխանատուութեան զգացումը եւ ժամանակի արժեւորումը:
«Ասիկա կամուրջ մըն է, որ քեզ կը միացնէ աշխարհին ու երազներուդ: Առցանց ծրագիրը պարզապէս նպաստաւոր միջոց մը չէ, այլ երազներդ չյետաձգելու եւ կարողութիւններդ շարունակաբար զարգացնելու իսկական հնարաւորութիւն»։
Յորդոր՝ ապագայ ուսանողներուն
Նանոր Թիւթիւնճեան վստահօրէն խորհուրդ կու տայ ՝ հետեւիլ ՀԲԸՄ ՀՀՀ-ի ծրագիրներուն, քանի որ անոնք հնարաւորութիւն կու տան աճելու թէ՛ մասնագիտական եւ թէ՛ անձնական մակարդակներու վրայ: Այս հարթակը կը դառնայ միաւորող ուժ մը, որ զանազան վայրերու մէջ գտնուող հայ ուսանողները կը համախմբէ մէկ մտաւոր համայնքի շուրջ:
Նիւթը հրատարակութեան պատրաստեց՝ «Արեւելք»ը։
(Օգտուած ենք Հայկական Առցանց Համալսարանի կայքէջէն)
