«Հայրենիքը միայն պիտի չսիրենք իր լաւ օրերուն»Ամերիկահայ բժիշկ՝ Վաչէ Վասիլեան (Տեսանիւթ)

 «Հայրենիքը  միայն  պիտի չսիրենք  իր լաւ  օրերուն»Ամերիկահայ բժիշկ՝  Վաչէ  Վասիլեան (Տեսանիւթ)

Միացեալ Նահանգներէն՝ (Ֆրեզնոյէն) ժամանած բժիշկներու առաքելութիւնը արդէն հասած է  իր աւարտին: «Արեւելք»   մի քանի առիթներով լուսաբանեց անոնց աշխատանքը։

Առաքելութեան անդամակցող  բժիշկները այցելեցին նաեւ Արցախի Աղաւնօ գիւղը ու ներկայ եղան հաւաքական մկրտութեան արարողութեան: Այս մասին «Արեւելք»ին կը պատմէ առաքելութեան մասնակից, բժիշկ Վաչէ Վասիլեան:

«Մեր Հայաստան եղած ատեն, միեւնոյն ժամանակ Աղաւնօ գիւղ ալ այցելեցինք, շատ աւելի զօրացած զգացի ու նաեւ աւելի ամրացած: Հայաստանը քարտէզի վրայ նկար մը չէ, Հայաստանը հայրենիքի ժողովուրդն է, անկախ թէ ով է իշխանութեան գլուխը: Հայրենիքի ժողովուրդը այսօր ամէն ժամանակէ աւելի կարիքը ունի մեր աջակցութեան, եւ ոչ թէ  միայն նիւթական առումով:  Հայերը պէտք է գան Հայաստան, այցելեն ընտանիքներու  ու անոնց տան հոգեկան հանգստութիւն, աջակցութիւն,  որպէսզի հայրենի ժողովուրդը իմանայ, որ այս նեղ օրերուն մենք իրենց հետն ենք: Ճիշդ է աղէտալի պատերազմէն նոր դուրս եկած ենք, բայց մենք յոյս պէտք է ներշնչենք, ու ըսենք բոլորին որ մենք մէկ ենք ու միասին: Հայրենիքը պիտի չսիրենք միայն լաւ օրերուն, երբ մէկը ցաւի ու կարիքի մէջ է եւ մենք կը սիրենք ու կը յարգենք զինք անպայման նեցուկ կը կանգնինք իրեն: Ես կը հաւատամ հիմա, որ հայրենիքը բոլորիս կարիքը ունի, եւ մենք բոլորս միասնաբար, այս ցաւը որոշ չափով պիտի մեղմացնենք, դուրս գանք անկէ ու շարժինք առաջ:

Անշուշտ որ պատերազմէն նոր դուրս ելած Հայաստանը դարձած է այս տարածաշրջանի կիզակէտը: Բայց վախը գոյութիւն կ'ունենայ երբ մենք անմիասնական ենք, իսկ երբ միասին ենք, մէկ ենք, ամուր ենք ու ես այն ատեն ոչ մէկ բանէ կը վախնամ: Մեզի այդ միասնականութիւնը պէտք է, որովհետեւ անով ամէն ինչ կը յաղթահարենք եւ որեւէ մէկ պետութիւն, ով ուզէ ըլլայ, չի կրնար մեզի ոչնչացնել երբ միասնական ենք: Իսկ երբ տարանջատուած ենք շատ հեշտ է վատութիւն հասցնելը մեզի եւ այդ է մտահոգիչը ինծի համար: Երբ միասնական ենք նոյնիսկ մեր կորսնցուցածը կրնանք ետ բերել, եւ անշուշտ այդ միասնականութիւնը պիտի ըլլայ ճիշդ ձեւով ծրագրուած: Եւ ձեռք ձեռքի, սփիւռք- հայրենիք միասին անկեղծօրէն համագործակցելով լուծումներ գտնենք ամբողջ այս մեր ցաւերուն»: