9.18c
Երեվան
կրկ, ապր 12
ԱՄՆ չէ կրցած Փաքիստանի մէջ տեղի ունեցած բանակցութիւններու ընթացքին համաձայնութեան գալ Իրանի հետ պատերազմը դադրեցնելու հարցին շուրջ։ Այս մասին Ապրիլ 12-ի գիշերը յայտարարած է ԱՄՆ փոխնախագահ Ճէյ Տի Վենսը։
«Կը կարծեմ սա շատ աւելի վատ լուր է Իրանի, քան Ամերիկայի Միացեալ Նահանգներու համար»,– ըսած է Վենսը։ Ան աւելցուցած է, որ ԱՄՆ ներկայացուցած է վերջնական առաջարկ, սակայն իրանցի բանակցողները մերժած են ընդունիլ Ուաշինկթընի պայմանները։
Միացեալ Նահանգներու եւ Իրանի պատուիրակութիւնները լքած են Իսլամապատը։
Իրանի արտաքին գործոց նախարարութիւնը, իր կարգին, յայտարարած է, որ կողմերը փոխըմբռնման հասած են շարք մը հարցերու շուրջ, սակայն համաձայնութեան չեն հասած «երկու կամ երեք կարեւոր հարցերու» շուրջ։ Ըստ Tasnim գործակալութեան՝ ԱՄՆ պահանջած է, որ հարստացուած ուրանը հեռացուի Իրանէն։ Financial Times-ը հաղորդած է, որ կողմերը փակուղի մտած են Հորմուզի նեղուցի բացման հարցի վերաբերալ։
Բանակցութիւնները տեղի ունեցած են Ապրիլ 11-ին եւ Ապրիլ 12-ի գիշերը։ Իրանցի պաշտօնեաները յայտարարած են, որ բանակցութիւնները տեւած են գրեթէ 25 ժամ։
Բանակցութիւններու աւարտէն ետք ԱՄՆ կեդրոնական հրամանատարութիւնը յայտնած է, որ ռազմածովային ուժերը օդանաւեր կը պատրաստեն պատասխանատուութեան գօտիի վրայ թռիչքներու համար։
Ապրիլ 8-ի գիշերը ԱՄՆ եւ Իրան համաձայնութեան եկած էին երկշաբաթեայ հրադադարի եւ Հորմուզի նեղուցի բացման շուրջ։ Axios կը հաղորդէ, որ բանակցութիւններու փակուղի մտնելուն պատճառով հրադադարը այժմ վտանգուած է։
Ապրիլ 11-ին, Իսլամապատի մէջ բանակցութիւններու լոյսի ներքոյ, ԱՄՆ զինուած ուժերը սկսած են գործողութիւն՝ Հորմուզի նեղուցը մաքրելու համար։ Այս մասին յայտարարած է ԱՄՆ նախագահ Տանըլտ Թրամփը։ Իսլամական յեղափոխութեան պահակագունդը (ԻՅՊԿ) Ապրիլ 12-ին յայտարարած է, որ պիտի կանխէ ռազմանաւերու՝ նեղուցով անցնելու որեւէ փորձ։ ԻՅՊԿ շեշտած է, որ որոշ պայմաններու պարագային նեղուցով անցքը կը թոյլատրուի միայն քաղաքացիական նաւերուն։ Այս յայտարարութենէն դատելով՝ նաւարկութիւնը ներկայիս փակ է։
