23.1c
Երեվան
չրք, հլս 15
Հայաստանի ոստիկանութիւնը 16.04.2018-ին որոշում կայացուցած է դադրեցնել Նիկոլ Փաշինեանի նախաձեռնած հաւաքը եւ պահանջած է հաւաքի ղեկավարէն այդ մասին անմիջապէս տեղեկացնել հաւաքի մասնակիցներուն: Այս մասին ըսուած է ՀՀ ոստիկանութեան հրապարակած յայտարարութեան մէջ:
ՀՀ ոստիկանութեան յայտարարութեան մէջ ըսուած է․ «ՀՀ Ազգային Ժողովի պատգամաւոր Նիկոլ Փաշինեանի ղեկավարած հաւաքը 2018 թուականի ապրիլի 13-էն իրականացուած է Երեւան քաղաքի ճանապարհները դիտաւորութեամբ փակելու, կազմակերպութիւնների բնականոն գործունէութեանը խոչընդոտելու, կենսական նշանակութեան փոխադրամիջոցային հանգոյցները շրջափակելու եւ երթևեկութիւնը կաթուածահար անելու, ոստիկանութեան ծառայողների օրինական պահանջներին չենթարկուելու, վերջիններիս նկատմամբ բռնի գործողութիւններ կատարելով զանգուածային անկարգութիւնների դրսեւորումներով:
Հաւաքի կազմակերպիչները պարբերաբար կոչեր են հնչեցնում պատգամաւորների մուտքը Ազգային ժողով արգելելու եւ Ազգային ժողովի շէնքը շրջափակելու վերաբերեալ: Չնայած այն հանգամանքին, որ մարդկանց իրաւունքների ապօրինի սահմանափակումները եւ հասարակական կարգը խախտող խմբային գործողութիւնները կրել են շարունակական բնոյթ, ՀՀ ոստիկանութիւնը, ղեկավարուելով ՀՀ Սահմանադրութեան 78-րդ յօդուածով նախատեսուած համաչափութեան սկզբունքով, շուրջ 3 օր սահմանափակուել է բացառապէս հաւաքի կազմակերպիչներին եւ մասնակիցներին բանաւոր նախազգուշացումներ տալով եւ պահանջներ ներկայացնելով, որոնք, սակայն, ամբողջութեամբ անտեսուել են հաւաքի ղեկավարի եւ մասնակիցների կողմից:
Ոստիկանութիւնը հաւաքի ազատութեան իրաւունքին միջամտող այլ գործողութիւններ չի կատարել, քանի որ հաւաքը հիմնականում կրել է խաղաղ բնոյթ: Հաւաքը որոշակի ժամանակահատուած դադարել է խաղաղ լինելուց, յատկապէս, երբ ապրիլի 16-ին Նիկոլ Փաշինեանը հաւաքի մասնակիցներին ուղղորդել է դէպի Բաղրամեան պողոտայ՝ փորձելով ճեղքել հասարակական կարգի պահպանություն իրականացնող ոստիկանական պատնեշը: Հրահրված բախումների արդիւնքում տեղի են ունեցել զանգուածային անկարգութիւններ, որոնց արդիւնքում վնաս է պատճառուել անձանց առողջութեանը, հանրային սեփականութիւն հանդիսացող գոյքին:
Հիմք ընդունելով «Հաւաքների ազատութեան մասին» ՀՀ օրրէնքի 33-րդ յօդուածը, Ոստիկանութիւնը 16.04.2018թ. որոշում է կայացրել դադարեցնել հաւաքը եւ պահանջել է հաւաքի ղեկավարից կատարել այն, այդ մասին անմիջապէս տեղեկացնել հաւաքի մասնակիցներին: Պարզաբանում ենք, որ օրէնքի նշուած յօդուածի համաձայն՝ հաւաքի ղեկավարի բացակայութեան կամ հաւաքի ղեկավարի կողմից ոստիկանութեան պահանջը չկատարելու դէպքերում ոստիկանութիւնը հաւաքը ցրելու, ներառեալ` «Ոստիկանութեան մասին» Հայաստանի Հանրապետութեան օրէնքով նախատեսուած յատուկ միջոցներ կիրառելու լիազօրութիւն ունի։ Վերոգրեալից ելնելով՝ նախազգուշացնում ենք հաւաքի կազմակերպիչներին չշարունակել անօրինական հաւաքը՝ զերծ մնալու համար հաւաքը ցրելու միջոցներ կիրառելու ոստիկանութեան պարտականութեան կատարումից»-, ըսուած է յայտարարութեան մէջ:
