21.09c
Երեվան
երկ, հկտ 19
Ռուսական օդուժի նախկին հրամանատար, «Դաշնային խորհուրդ»ի պաշտպանութեան յանձնաժողովի նախագահ Վիքթոր Պենտարեւ յայտնած է, որ Ռուսիա մտադիր է Սուրիոյ քաղաքացիներու անվտանգութիւնն ու ներքին կարգ ու կանոնը պահպանելն ապահովելու չափով զօրքեր պահել երկրին մէջ: Այս մասին կը գրէ «Ալ Տիար» լրատուական կայքը:
Ըստ աղբիւրին, Ռուսիա մտադիր է կրճատել իր զինուորներու թիւը Սուրիոյ մէջ: Այսինքն այնտեղ պիտի շարունակեն մնալ ռազմական ոստիկանութեան որոշ ուժեր, ռազմական խորհրդականներ, եւ քիչ թիւով զինուորներ, որոնք բաւարար են Հումայհեմի եւ Թարթուսի մէջ ռուսական ռազմակայանները պաշտպանելու համար:
Պենտարեւի յայտարարութեան համաձայն, «Իսլամական Պետութիւն» ահաբեկչական խմբաւորման դէմ երկու տարի առաջ մեկնարկած ռազմական գործողութիւններու արդիւնքով Սուրիոյ 95 տոկոսը ազատագրուած է վերջինիս տիրապետութենէն, հետեւաբար բնական է, որ ազատագրման աշխատանքներն աւարտին հասցնելու, ինչպէս նաեւ ազատագրուած տարածքները պաշտպանելու նպատակով որոշ ուժեր պահուին այնտեղ:
Իր հերթին Տումայի խորհուրդի միջազգային հարցերու յանձնաժողովի նախագահ Լիոնիտ Սլութսքի յայտնած է, որ Սուրիոյ մէջ իրականացուող ռազմական գործողութիւններուն հետ կապուած որեւէ յայտարարութիւն պէտք է բացառապէս Պաշտպանութեան նախարարութեան կողմէ հրապարակուի:
