16.09c
Երեվան
երկ, հկտ 19
Մեսրոպեան բարձրագոյն արուեստից վարժարանը Հինգշաբթի, 8 Հոկտեմբեր 2026-ին, պաշտօնապէս դիմաւորեց իր աշակերտները՝ նոր կրթական տարեշրջանը սկսելով խանդավառութեամբ, նոր նպատակներով եւ ուսումնական յաջողութեան ակնկալիքներով։ Այս առիթով վարժարանի տնօրէնութիւնն ու պատասխանատուները աշակերտներուն փոխանցեցին քաջալերական պատգամներ՝ շեշտելով ինքնավստահութեան, կարգապահութեան եւ պատասխանատուութեան կարեւորութիւնը կրթական յառաջընթացի ու անձնական զարգացման ճամբուն վրայ։
Ստորեւ այդ մասին խմբագրութեանս յղուած հաղորդագրութիւնը՝
Հինգշաբթի, 8 Հոկտեմբեր 2026-ին, Մեսրոպեան բարձրագոյն արուեստից վարժարանը պաշտօնապէս դիմաւորեց իր աշակերտները՝ նոր կրթական տարեշրջանը սկսելով խանդավառութեամբ եւ նոր նպատակներով։
Առաւօտեան եւ յետմիջօրէի բաժանմունքներու աշակերտները առիթ ունեցան հանդիպելու վարժարանի տնօրէն պարոն Կրէկուար Գալուստին, որ ջերմօրէն ողջունեց զանոնք՝ քաջալերական պատգամներով։ Ան յորդորեց աշակերտները վստահիլ իրենց կարողութիւններուն, հաւատալ իրենց ներուժին եւ Մեսրոպեան բարձրագոյն արուեստից վարժարանին մէջ իրենց ուսումնական ուղեւորութեան ընթացքին հետամուտ ըլլալ իրենց երազներուն ու նպատակներուն։
Տնօրէնին ողջոյնի խօսքէն ետք, բաժանմունքի պատասխանատու պրն. Սերժ Հաննա դիմեց աշակերտներուն՝ ներկայացնելով վարժարանի ներքին կանոնները։ Ան ընդգծեց կարգապահութեան, փոխադարձ յարգանքի եւ պատասխանատուութեան կարեւորութիւնը՝ դրական ուսումնական միջավայր մը ստեղծելու համար, ուր իւրաքանչիւր աշակերտ կրնայ զարգանալ, յառաջդիմել եւ իր նպատակներուն հասնիլ։
Նոր կրթական տարեշրջանի մեկնարկին, Մեսրոպեան բարձրագոյն արուեստից վարժարանը կը վերահաստատէ իր յանձնառութիւնը՝ առաջնորդելու իր աշակերտները դէպի ուսումնական յաջողութիւն, անձնական զարգացում եւ մասնագիտական բարձր մակարդակ։
