9.09c
Երեվան
շբթ, մյս 09
Հարիւրաւոր ցուցարարներ բողոքի ցոյց կատարած են Լոնտոնի մէջ: Անոնք իրենց կառավարութիւնէն պահանջած են անյապաղ միջամտութիւն կատարել մարդկային մեծ ողբերգութիւն մը հեռու պահելու համար Հալէպի արեւելեան հատուածներէն:
Առաջին անգամը չէ, որ արեւմուտքի այսպէս կոչուած «հանրային կարծիք»ը նման կեցուածքով մը հանդէս կու գայ:
Ցոյցեր, բողոքներ, ամօթանք եւ մարդկային իրաւանց ջատագով ըլլալու կեցուածքներու դրսեւորում:
Վերադառնալով Հալէպին, պէտք է անպայման շեշտել, որ Հալէպի մէջ մղուած ճակատամարտը միայն Սուրիոյ նախագահին կողմէ մղուած ճակատամարտ մը չէ:
Իրանի ու անկէ ետք Ռուսաստանի կողմէ կատարուած միջամտութիւնը ունի գաղափարական երես, որուն սահմանները մեզի ետ կը տանին երկբեւեռ աշխարհի «սառն» օրերուն:
Իրօք, ո՞վ էր Հալէպի մէջ պատերազմ հրահրողը: Եւ խորքին մէջ յանուն ինչի՞ մեկնարկեց արդէն վեց տարիէի ի վեր սուրիացիներն ու ողջ երկիրը արեան մէջ թաթխած այս հակամարտութիւնը:
Եւ ամենակարեւորը, ո՞ւր էին անոնք, որ այսօր մարդկային իրաւունքներու քողին տակ փողոց իջած են եւ «արդարութիւն» կը պահանջեն:
Այս հանգրուանին համար պահանջուած արդարութիւնը անշուշտ Հալէպի արեւելեան շրջաններուն մէջ թաքնուած եւ որպէս չափաւորական ընդդիմադիր ճանչցուած իսլամիստներուն համար է, որոնք վեց տարի ի վեր հրոյ ճարակ դարձուցին Միջին Արեւելքի ընդհանուր տեսադաշտին մէջ իր յատուկ նշանակութիւնն ու արժէք ներկայացնող Սուրիան: Չմոռնանք ՝ արաբական Սուրիան եւ այն Սուրիան, որ դարձած էր վէմը արաբականութեան դատին: Այս բոլորը փաստացի տուեալներ են ու զարմանալի է, որ մինչ այդ իրենց ծպտունը չհանած ու մարդու իրաւունքներով «տառապող» ամբոխները այսօր «խելագարած» են եւ կը պահանջեն «ազատութիւն» այդ զինեալներուն համար:
Յիշեցնելու կարգով պէտք է շեշտադրել, որ Հալէպի սահմանները չեն աւարտիր Թուրքիոյ սահմանին մօտ եղող «Ալ Պապ» շրջանին մէջ: Հալէպի իրական սահմանները Մոսկուայի դռներն է: Հալէպը առանց չափազանցելու Մոսկուայի նախադուռն է: Եթէ հարցերը այս տեսանկիւնէ քննենք, ապա յստակ կը դառնայ, որ ինչու այդքան հզօր ճիգեր նեդրուեցան ազատագրելու համար Հալէպը: Այն Հալէպը, որ մեզի համար ալ կարեւոր ու հայապահպանութեան պարիսպ մ'է: Միւս կէտերը մանրամասնութիւններ են, մանաւանդ որ գեր-տէրութիւններու հաշիւներուն եւ ռազմաքաղաքական քայլերուն մէջ մանրամասնութիւնները հաշուի չեն առնուիր: Կը մնայ յուսալ, որ Հալէպի համար մղուած այս թէժ պայքարներէն ետք սիւննի աշխարհի «տէրերը» կը հասկնան Մոսկուայէն հնչած պատգամը:
Այլապէս Հալէպի, Ռաքքայի, Փալմիրայի եւ նոյնիսկ Պէյրութի մէջ բաւական ծանր եւ անկանխատեսելի դէպքեր կրնան գրանցուիլ:
