5.99c
Երեվան
ուրբ, ապր 17
Ընկերային ցանցերով Հայոց ցեղասպանութեան շուրջ բանավէճեր բռնկած են Թուրքիոյ քրտամէտ Ժողովուրդներու դեմոկրատական կուսակցութեան եւ Թուրքիոյ նախագահ՝ Ռէճէպ Թայէպ Էրտողանի աշխատակազմի հասարակայնութեան հետ կապերու վարչութեան պետ՝ Ֆախրէլտին Ալթունի միջեւ: Այս մասին կը տեղեկացնէ Gazete Duvar պարբերականը:
Թուրքիոյ քրտամէտ կուսակցութեան գործադիր կոմիտէն, թուիթըրեան էջով Հայոց ցեղասպանութեան վերաբերեալ հաղորդագրութիւն տարածած էր, ուր մասնաւորապէս ըսած.
«1915 թուականի Ապրիլ 24-ին «Միութիւն եւ առաջադիմութիւն» կազմակերպութեան կոմիտէի կողմէն շուրջ 250 հայ մտաւորական եւ քաղաքական գործիչ դուրս հանուեցան սեփական տուներէն, ուղարկուեցան աքսոր եւ սպաննուեցան: Հայ ժողովուրդը, որ հազարամեակներով կ'ապրէր իր հայրենիքը, զանգուածային կերպով ոչնչացուեցաւ: Յանցագործութիւնը, որու հետ առերեսումն չեն ըրած, կը կրկնուի, յանցագործութիւնը տեղափոխուած է մեր օրերը: Մեծ յանցագործութիւնը անպատիժ մնացած է, խտրականութեան ու ատելութեան հողի վրայ կատարուող յանցագործութիւնները սովորական բան դարձած են: 106-րդ տարելիցին մենք կը զգանք հայերու եւ այս հողերու հնագոյն ժողովուրդի դէմ իրականացուած ցեղասպանութիւնը, մեծ աղէտն ու մարդկային ողբերգութիւնը, եւ յարգանքով ու գթասրտութեամբ կը յիշենք սպաննուածները»:
Քրտամէտ կուսակցութեան` «Հայոց ցեղասպանութեան ամօթը» վերնագրուած այս հաղորդագրութեան պատասխանած է Թուրքիոյ նախագահականի հասարակայնութեան հետ կապերու վարչութեան պետ՝ Ֆախրէլտին Ալթուն.-
«Մեր երկար եւ փառաւոր պատմութիւնը մեր հպարտութեան աղբիւրն է: Ձեր կարճ եւ մռայլ պատմութիւնը լի է խայտառակութեամբ: Այդ պատմութիւնը անջատողական ահաբեկչական կազմակերպութեան պատմութիւն է»,- գրած է Ալթուն:
Քրտամէտ կուսակցութիւնը, ետ չմնալով քաղաքական հակառակորդէն, պատասխանած է Ալթունին.-
«Դուք պատմեցիք, թէ ինչ կատարուած է ձեր հետ: Ամօթը ձերն է... փտածութիւն, ապօրինութիւն, անարդարութիւն, պատերազմ, մահ... սարերու ետեւը չեն այն օրերը, երբ դուք առերեսումն կ'ընէք ձեր պատմութեան հետ»,-գրուած է կուսակցութեան թուիթըրեան էջին:
