4.09c
Երեվան
երք, հնվ 21
Կ՛ակնկալուի, որ յաջորդ տասնամեակի ընթացքին հինգ մարդ կը կուտակէ առնուազն մէկական թրիլիոն տոլար կարողութիւն, եթէ ընթացիկ միտումները շարունակուին. այս մասին, CNN-ի հաղորդմամբ , ըսուած է Oxfam-ի տարեկան անհաւասարութեան զեկոյցին մէջ:
Tesla-ի եւ SpaceX-ի գործադիր տնօրէն Իլոն Մասքը, որ ներկայիս աշխարհի ամենահարուստ մարդն է եւ որուն կարողութիւնը կը գերազանցէ 430 միլիար տոլարը, ըստ կանխատեսումներուն, պէտք է որ հատէ մէկ թրիլիոն տոլարի սահմանագիծը ընդամէնը հինգ տարիէն:
Անոր կը յաջորդեն Amazon-ի հիմնադիր Ճեֆ Պեզոսը, Oracle-ի հիմնադիր Լարրի Էլիսընը, Meta-ի գործադիր տնօրէն Մարք Զուքըրպըրկը, LVMH-ի գործադիր տնօրէն Պերնար Առնոն:
2024 թուականը շատ եկամտաբեր տարի էր աշխարհի ամենահարուստ մարդոց եւ ընտանիքներու համար, որ մասամբ պայմանաւորուած էր ԱՄՆ-ի ֆոնտային շուկայի աճով, պարզած է Oxfam-ը: Անոնց կարողութիւնը այնքան արագ աւելցած է , որ Oxfam-ը վերատեսութեան ենթարկած է անցեալ տարուան իր գնահատականը, ըստ որուն՝ յաջորդ տասնամեակին միայն մէկ թրիլիոնատէր պիտի ըլլայ:
«Այս ծայրայեղ անհաւասարութիւնը ուրախանալիք բան չէ», - ըսած է Oxfam America-ի ներկայացուցիչ Ռեպէքա Ռիտըլը:
Անցեալ տարի միլիառատէրերու շարքերն աւելցած են աւելի քան 200-ով՝ հասնելով մօտ 2,770-ի: Անոնց կարողութիւնը ընդհանուր աւելցած է 2,1 թրիլիոն տոլարով, երեք անգամ աւելի շատ, քան նախորդ տարի՝ ընդհանուր առմամբ կազմելով 15 թրիլիոն տոլար:
Մինչդեռ աղքատութեան մէջ ապրող մարդոց թիւը մօտաւորապէս նոյնն է, ինչ որ 1990 թուականին, կ՛ըսուի զեկոյցին մէջ՝ վկայակոչելով Համաշխարհային պանքի տուեալները։
