9.09c
Երեվան
չրք, մյս 06
Պայտըն Եւ Պայտըն
Միացեալ Նահանգներու նախագահ Ճօ Պայտըն եւս ունի նմանակ մը` դերասան Քեւին Տալթոն: Քեւինի եւ նախագահ Պայտընի նմանութիւնները ապշեցուցիչ են:
– Ե՛ւ Քեւին, ե՛ւ նախագահ Պայտըն հիւսիսարեւելեան իրլանտացի ամերիկացիներ են:
– Երկուքն ալ կու գան աշխատաւոր դասակարգի ընտանիքներէ, որոնք կը հաւատային Դեմոկրատական կուսակցութեան սկզբունքներուն:
– Երկուքն ալ ունին ամերիկեան հիւսիսարեւելեան առոգանութիւնը:
– Ե՛ւ Քեւին, ե՛ւ նախագահ Պայտըն իրլանտացի կաթողիկէ են:
– Երկուքն ալ ծնած են քաղաքային միջավայրի մէջ, նախագահ Պայտըն` Փենսիլվանիա, Քեւին` Նիւ Եորք:
– Երկուքն ալ յաճախած են կաթողիկէ դպրոց եւ համալսարան:
Քեւին Տալթոն Դիմատետրի իր էջին մէջ գրած է.
«Բարե՛ւ, ինծի ըսին, որ կը նմանիմ Ճօ Պայտընին: Զիս յաճախ կը կանգնեցնեն փողոցին մէջ եւ սելֆի կը խնդրեն: Այս բոլորէն ետք, ես շատ մտածած եմ Ճօ Պայտընի հետ իմ նմանութիւնս դրամ շահելու միջոցի վերածելու մասին: Ես ստեղծած եմ կայք. joebidenlookalike.com.»:
Զելենսքի Եւ Զելենսքի
Ուքրանիոյ նախագահ Վոլոտիմիր Զելենսքին համաշխարհային համբաւ շահեցաւ, երբ Ռուսիա զինուորական գործողութիւն շղթայազերծեց Ուքրանիոյ մէջ:
Այժմ հազարաւոր համակիրներ կ՛ըսեն, որ 44-ամեայ քաղաքական գործիչին մասին շարժանկար պէտք է նկարահանել Հոլիվուտի մէջ, եւ կոչ կ՛ուղղեն, որ գլխաւոր դերը ստանձնէ 51-ամեայ դերասան Ճերեմի Ռեններ:
«Բոլորին համար ակներեւ չէ՞, որ Ճերեմի Ռեններ Զելենսքիի դերակատարման միակ տրամաբանական տարբերակն է այն կենսագրական ժապաւէններուն մէջ, որոնք գրեթէ անկասկած արդէն կը պատրաստեն», գրած է համակիր մը X-ի մէջ` հրապարակելով Ռենների եւ Զելենսքիի նկարները:
Իսկապէս Զելենսքին եւ Ռենները ապշեցուցիչ նմանութիւններ ունին: Անոնք երկուքն ալ ունին 170 սմ հասակ, խոր աչքեր, շագանակագոյն կարճ մազեր եւ ծնօտի գրեթէ նոյն գիծ:
Ռեններ նախապէս մարմնաւորած է պատերազմի հերոս մը «The Hurt Locker» շարժանկարին մէջ:
Հասարակական ցանցերուն մէջ բազմաթիւ համակիրներ այդ ժապաւէնէն դերասանի սքրինշոթները տեղադրած են Զելենսքիի լուսանկարներով, փողոց ելած` Քիեւը պաշտպանելու:
Մերքել Եւ Մերքել
Գերմանական թատրոնի աստղ Իմոկեն Քոկեն 2022-ին մարմնաւորեց աշխարհի ամէնէն հզօր կինը` Գերմանիոյ վարչապետ Անկելա Մերքելը, պատկերասփիւռային շարժապատկերի մը մէջ:
Շտեֆան Վակների բեմադրած շարժապատկերը` Die Getriebenen (The Driven) հիմնուած է գերմանացի լրագրող Ռոպին Ալեքսանտրի պեսթսելլերին վրայ եւ կը հետեւի Մերքելի կեանքի ամէնէն կոթողային որոշման:
Երբ Սուրիոյ մէջ քաղաքացիական պատերազմէն փախած միլիոնաւոր գաղթականներ սկսան լեցուիլ Եւրոպա, Գերմանիոյ վարչապետը, որ յայտնի է քաղաքականութեան հանդէպ իր զգուշաւոր եւ վերլուծական մօտեցումով, կտրուկ եւ արեւմտեան մեծ առաջնորդներու մէջ եզակի որոշում տուաւ` բանալ իր երկրի սահմանները:
Հակառակ անոր որ շատերը կը դրուատէին զայն ճգնաժամի ժամանակ անոր բարոյական դիրքորոշման համար, այդ քայլը նոյնպէս ուժեղացուց ծայրայեղ աջերը Գերմանիոյ մէջ եւ քաղաքականապէս վնասեց Մերքելին:
Քենետի Եւ Քենետի
Ամերիկացի կատակերգակ, գրող եւ դերասան Քոլին Ճոսթ ծնած է Միացեալ Նահանգներու նախագահ Ճոն Քենետիի սպանութենէն շուրջ քսան տարի ետք:
Երբ ան սկսաւ հռչակ շահիլ, ոմանք ըսին, որ դիմագիծով շատ նման է Ճոն Քենետիին, մինչ Քենետին չսիրողները հասարակական ցանցերուն մէջ գրեցին, որ իրենք ոչ մէկ նմանութիւն կը տեսնեն:
Այս հրապարակումները Քոլին Ճոսթիի յաւելեալ հռչակ տուին:
Ստալին Եւ Ստալին
Կ՛ըսուի, թէ նմանակներէ օգտուող առաջնորդներէն եղած են Խորհրդային Միութեան ղեկավարները, որոնց շարքին` Ստալին: Ան նոյնիսկ իր շուրջիններէն կասկածած է եւ ապահովական խիստ միջոցներ որդեգրած է:
Ստալինի նմանակը` «Ռաշիտ», մահացած է 1991 թուականին, 93 տարեկանին:
2008 թուականին յայտնուեցաւ Ստալինի այլ նմանակ մը` Ֆելիքս Տատայեւ, որ գիրք հրատարակած է իր արկածներու մասին` որպէս քաղաքական խարդախութիւն:
Փութինի կառավարութիւնը արտօնած է Տատայեւին` պատմել իր պատմութիւնը 88 տարեկանին: Ան նկարահանուած է 2014 թուականին, Ստալինի վերջին օրերու մասին գերմանական պատկերասփիւռի կայանի մը պատրաստած վաւերագրական շարժապատկերին մէջ:
Պրեժնեւ Եւ Պրեժնեւ
Ճակատագիրի հեգնանք է, որ Աստուծոյ չհաւատացող, անաստուածութիւն դաւանող Խորհրդային Միութեան ղեկավարներէն Լէոնիտ Պրեժնեւի նմանակը պիտի ըլլար ամերիկացի քարոզիչ Ռ. Ս. Սփրուլ:
Մաքրոն Եւ Մաքրոն
Այս պարագային կարելի է ըսել, որ Ֆրանսայի նախագահ Է. Մաքրոն ի՛նք կը նմանի… իր նմանակին:
Պորիս Վիան` ֆրանսացի գրող, բանաստեղծ, երաժիշտ, երգիչ, թարգմանիչ, քննադատ, դերասան, գիւտարար եւ ճարտարագէտ, ծնած է 1920-ին եւ մահացած` 1959-ին:
Անոր վէպերը, Վերնոն Սալիվան կեղծանունով, քրէական գեղարուեստական գրականութեան տարօրինակ երգիծանքներ էին, որոնք խիստ վիճելի էին հրապարակման պահուն` իրենց ոչ աւանդական հայեացքներուն պատճառով:
Վիանի գեղարուեստական այն գործերը, որոնք հրատարակուած են իր իսկական անունով, կ՛առանձնանան խիստ անհատական գրելու ոճով` բազմաթիւ յօրինուած բառերով, նուրբ բառախաղով եւ գերիրապաշտ նիւթերով: Անոր «L՛Écume des jours» վէպը այս գործերէն ամէնէն յայտնին է եւ` անգլերէն թարգմանուած քիչերէն մէկը:
Վիան կարեւոր ազդեցութիւն ունեցաւ ֆրանսական ճազի վրայ: Ան Փարիզի մէջ ծառայեց որպէս Հոակի Քարմայքլի, Տիւք Էլինկթոնի եւ Մայլս Տէյվիսի կապը: Միացեալ Նահանգներու եւ Ֆրանսայի մէջ հրատարակեց բազմաթիւ յօդուածներ` ճազին առնչուող:
Վիանի ստեղծագործած երաժշտութիւնն ու երգերը մեծ ժողովրդականութիւն վայելած են իր կեանքի ընթացքին, մասնաւորապէս` հակապատերազմեան « Le déserteur » երգը:
Պատրաստեց՝ Նարէ Գալեմքէրեան
Նիւթը՝ «Ազդակ»էն
