16.09c
Երեվան
ուրբ, սպտ 20
«Թէեւ Թուրքիան շարունակաբար յայտարարում է, որ կարգաւորման գործընթացը պէտք է տեղի ունենայ առանց որեւէ նախապայմանի, այնուամենայնիւ, մենք կապ ենք տեսնում Հայաստան-Թուրքիա եւ Հայաստան-Ատրպէյճան գործընթացների միջեւ»:
ՀՀ արտաքին գործոց նախարար Արարատ Միրզոյեան ըսած է, որ «ուրախ ենք լսել Թուրքիայի բարձրագոյն իշխանութեան յայտարարութիւններն այն մասին, թէ իրենք պատրաստ են կարգաւորել եւ դիւանագիտական յարաբերութիւններ հաստատել Հայաստանի հետ, բացել սահմանը»:
Այս մասին Միրզոյեան ըսած է Ռուսիոյ ԱԳ նախարար Սերգէյ Լաւրովի հետ համատեղ մամուլի ասուլիսի ընթացքին:
«Միւս կողմից, թէեւ Թուրքիան շարունակաբար յայտարարում է, որ կարգաւորման գործընթացը պէտք է տեղի ունենայ առանց որեւէ նախապայմանի, այնուամենայնիւ, մենք կապ ենք տեսնում Հայաստան-Թուրքիա եւ Հայաստան-Ատրպէյճան գործընթացների միջեւ: Կապ, որը Թուրքիայի իշխանութեան ներկայացուցիչները փորձում են գտնել կամ ընդգծել իւրաքանչիւր առիթով: Մենք չենք կարծում, որ սա կառուցողական է: Որոշակի տարբերութիւններ կան նաեւ կշռոյթի պահով», ըսած է ան:
Խօսելով Հայաստան-Ատրպէյճան յարաբերութիւններուն մասին` Արարատ Միրզոյեան ըսած է, որ բանակցութիւնները կ'ընթանան մի քանի ուղղութեամբ եւ «բազմաթիւ հարցերում պատկերացումները չեն համընկնում»:
«Մենք հաւատում ենք խաղաղութեան գործընթացին, կարծում ենք, որ յարաբերութիւնների կարգաւորման մէջ հնարաւոր չէ չանդրադառնալ ԼՂ հակամարտութեանը, չհասցէագրել ու քաղաքական կարգաւորում չտալ այդ հակամարտութեանը: Հաւատացած ենք, որ բանակցութիւնը պէտք է տեղի ունենա ԵԱՀԿ Մինսքի խմբի շրջանակներում», ըսած է ՀՀ ԱԳ նախարարը:
Արարատ Միրզոյեանը անդրադարձած է նաեւ սահմանազատման եւ սահմանային անվտանգութեան հարցերով ընթացող բանակցութիւններուն:
«Բանակցութիւններ ասելը փոքր-ինչ չափազանցուած է այս փուլի համար, բայց սկիզբը դրուած է, յանձնաժողովների երկրորդ հանդիպումը կը լինի Մոսկուայում: Որոշակի դրական տեղաշարժ ենք տեսնում տարածաշրջանային տնտեսական, առեւտրային ենթակառուցուածքների ապաշրջափակման առոմով: Սխալ կը լինի ասել, որ կայ լիարժէք պատկերացում, բայց դրական տեղաշարժ կայ: Պաքուի կողմից հայ ռազմագերիների եւ այլ պահուող անձանց շարունակական ազատ չարձակելը, մշակութային յուշարձանների նկատմամբ ոտնձգութիւնները, հակահայկական հռետորաբանութիւնը եւ սադրիչ գործողութիւնները միայն խանգարում են այս գործընթացներին», ըսած է Արարատ Միրզոյեանը:
