-2.91c
Երեվան
ուրբ, դկտ 26
Պատգամաւորն իր հարցին մէջ, մասնաւորապէս, նշած է.
«Նոյեմբերի 10-ի յայտարարութեան թեքսթից յետոյ առկայ են որոշակի անորոշութիւններ, մասնաւորապէս, Հայաստանի Հանրապետութիւնը եւ Ատրպէյճանի Հանրապետութիւնը ստացած են նոր 520 քմ երկարութեամբ հատուած, ուզում էի հասկանալ Կառավարութեան տեսլականը՝ այս հատուածում մենք ունենալու ենք այնպիսի շփման գիծ, ինչը Նոյեմբերեանի, Տաւուշի շրջանում է եղել, թէ՞ ունենալու ենք այլ տրամաբանութեամբ կառուցուած սահման, ինչը կայ օրինակ՝ Թուրքիայի հետ։
Փոխվարչապետն անցած հարցուպատասխանների ժամանակ մեզ հաւաստիացրել է, որ Ատրպէյճանի Հանրապետութեան հետ որեւիցէ փաստաթուղթ չկայ ստորագրուած, սակայն երէկ նախկին վարչապետ Հրանդ Բագրատեանն իր էջում հրապարակեց ինչ-որ հայ-ատրպէյճանական յուշագիր, որտեղ նշուած են որոշակի չափագրումներ, սկզբունքներ, սահմաններ։ Ի՞նչ յուշագրի մասին է խօսքը, արդեօք Հայաստանն ու Ատրպէյճանը բացառութեամբ նոյեմբերի 10-ի եւ յունուարի 11-ի յայտարարութիւններին, ունի որեւիցէ ստորագրած փաստաթուղթ»։
Տիգրան Աւինեանն ըսած է, որ պատգամաւորի այդ հարցին պատասխանելու պարագային որոշակի պետական գաղտնիքներ հանդիսացող տուեալներու մասին պէտք է խօսին. «Ցաւօք սրտի, այս ամպիոնից չենք կարող նման հարցեր քննարկել։ Կարող եմ ասել, որ, ընդհանուր առմամբ, սահմանապահ զօրքերն են Սիւնիքում հսկում սահմանները՝ ե՛ւ մեր, ե՛ւ ատրպէյճանական կողմից։ Եկէք նմանատիպ քննարկումները հանրայնօրէն չանենք։ Եթէ նմանատիպ հարցեր կան, որոնք անվտանգային միջավայրին են վերաբերում եւ նման մանրամասների մասին է խօսքը, կարծում եմ՝ համապատասխան յանձնաժողովներում կարող էք հանդիպումներ, լսումներ անցկացնել, հրաւիրել ՊՆ ներկայացուցիչներին, ԳՇ ներկայացուցիչներին, ԱԱԾ ներկայացուցիչներին եւ տեղեկանալ մանրամասներին»։
Սիմոնեանի դիտարկմամբ՝ կրնայ համաձայնագրի բովանդակային մասը գաղտնի մնալ, բայց հարց է՝ կա՞յ այդպիսի համաձայնագիր Ատրպէյճանի եւ Հայաստանի միջեւ՝ առանց Ռուսաստանի Դաշնութեան միջնորդութեան, թէ՞ ոչ։
«Առանց Ռուսաստանի Դաշնութեան միջնորդութեան որեւէ փաստաթղթի մասին տեղեկացուած չեմ։ Բացի այդ յայտարարութիւններից, որոնք արուել են, կայ եւս մէկ պայմանաւորուածութիւն՝ վերաբերող ճանապարհահատուածին Դաւիթ Բեկ-Գորիս հատուածում, քանի որ այնտեղ ճանապարհն անցնում էր վիճարկելի հատուածներով։ Դա միակ պայմանաւորուածութիւնն է ինձ յայտնի»,- պատասխանած է Աւինեանը։
