10.09c
Երեվան
հնգ, հկտ 08
Ատրպէյճանի մէջ շրջանառուող «Արեւմտեան Ատրպէյճան» խօսոյթը լրջագոյն մարտահրաւէր եւ անվտանգային սպառնալիք է Հայաստանի Հանրապետութեան, ինչպէս նաեւ հաստատուած խաղաղութեան համար: Երեւանի մէջ կայացող «Համապարփակ անվտանգութիւն եւ դիմակայունութիւն» միջազգային համաժողովի ժամանակ այս մասին յայտարարած է Հայաստանի վարչապետ Նիկոլ Փաշինեանը:
«Խաղաղութեան համաձայնագրի նախաստորագրումից աւելի քան 1 տարի անց Հայաստանում խօսւում է այն մասին եւ հետապնդւում է այն օրակարգը, որ «մենք պէտք է հզօրանանք եւ ազատագրենք Արցախի Հանրապետութիւնը»: Այս հարցադրումներին մենք հանրայնօրէն անդրադարձ չենք կատարում: Սա ֆունդամենտալ խնդիր է, որի հետ բախուել ենք նաեւ Ղարաբաղի հարցի կարգաւորման ամբողջ գործընթացում, երբ ունեցել ենք զուգահեռ խօսոյթներ եւ զուգահեռ ընկալումներ: Հայաստանի Հանրապետութիւնում ներքին կեանքում մենք այլ հարցադրումներ եւ շեշտադրումներ ենք արել, իսկ բանակցային սեղանի շուրջ բոլորովին այլ հարցեր են քննարկուել, բոլորովին այլ տրամաբանութեամբ: Ե՞րբ է, որ այս գործելակերպը հնարաւոր չի եղել շարունակել․ այն պահից, երբ յայտնուել են սոցիալական ցանցերը՝ ջնջել են ներքին եւ արտաքին խօսակցութեան սահմանները: Հիմա ուրիշ մարտահրաւէրների հետ ենք առնչւում, երբ գործ ունենք հրապարակային եւ ոչ հրապարակային խօսոյթների եւ բանաձեւումների զուգահեռ ուղղութեան հետ եւ, իմ կարծիքով, այստեղ է, որ նաեւ անվտանգութեան լրջագոյն մարտահրաւէրներ են առաջանում, որոնց հետ պէտք է առնչուենք:
Զուգահեռաբար, նմանատիպ գործընթացներ տեղի են ունենում Ադրբեջանում, մասնաւորապէս, բոլորիս յայտնի «Արեւմտեան Ադրբեջան»-ի խօսոյթը, որը լրջագոյն մարտահրաւէր է եւ անվտանգային սպառնալիք է Հայաստանի Հանրապետութեան համար եւ, որը սպառնալիք է Հայաստանի Հանրապետութեան տարածաշրջանային անվտանգութեան համար։ Հաստատուած խաղաղութեան համար շատ լրջագոյն մարտահրաւէր է: Այդ մարտահրաւէրների դրսեւորումները ժամանակ առ ժամանակ տեսնում ենք ամենատարբեր առիթներով»,-ըսած է Փաշինեանը:
Վարչապետը նշած է՝ անվտանգային մարտահրաւէրներուն անդրադառնալու ժամանակ պարզ կը դառնայ, որ մեր անվտանգային շատ խնդիրներ կը սկսին մեր միտքի մէջ՝ իրականութեան եւ միջավայրի ընկալումներուն մէջ, եւ այդ խնդիրն այսօր առկայ է Հայաստանի Հանրապետութեան մէջ:
