19.84c
Երեվան
ուրբ, հլս 17
Հայաստանի Հանրապետութեան կառավարութեան տեղեկատուութեան եւ հասարակութեան հետ կապերու վարչութենէն կը տեղեկացնեն, թէ վարչապետ Նիկոլ Փաշինեան ընդունած է Հայաստանի մէջ Լիբանանի արտակարգ եւ լիազօր դեսպան Մայա Տաղերը:
Զրուցակիցները քննարկած են հայ-լիբանանեան յարաբերութիւններու հետագայ զարգացման ու խորացման առնչուող շարք մը հարցեր:
Վարչապետ Նիկոլ Փաշինեան բարձր գնահատած է երկկողմանի քաղաքական փոխադարձ գործակցութեան մակարդակը եւ անհրաժեշտ նկատած ընդլայնել կապերը տնտեսութեան մարզին մէջ:
«Երկու երկիրներուն միջեւ տնտեսական մարզին մէջ համագործակցութեան լաւ հեռանկարներ կը տեսնենք եւ վստահ ենք, որ միացեալ ջանքերով կրնանք հասնիլ լաւ արդիւնքներու», ըսած է վարչապետը` աւելցնելով, որ լիբանանցի ներդրողները կրնան գործունէութիւն ծաւալել նաեւ մեր երկրի երեք ազատ տնտեսական գօտիներուն մէջ, ուր ստեղծուած են բարենպաստ պայմաններ: Վարչապետը շնորհակալութիւն յայտնած է Լիբանանին Հայոց ցեղասպանութեան եւ ղարաբաղեան տագնապի հարցով ցուցաբերած դիրքորոշումներուն համար:
Դեսպան Տաղեր ընդգծած է Լիբանանի հայ համայնքի կարեւոր դերը երկրի քաղաքական, հասարակական կեանքին մէջ եւ վստահութիւն յայտնած, որ երկու երկիրներու կառավարութիւններուն միջեւ աշխուժ համագործակցութիւնը պիտի նպաստէ երկկողմանի կապերու խորացման ու ընդլայնման: Դեսպանը տեղեկացուցած է, որ կը նախապատրաստուի լիբանանցի գործարարներու պատուիրակութեան այցելութիւնը Հայաստան եւ նշած, որ աշնան Հայաստան պիտի գտնուի նաեւ Լիբանանի նախագահը` Ֆրանսախօս երկիրներու վեհաժողովին մասնակցելու համար:
Հանդիպումի ընթացքին կողմերը քննարկած են երկուստեք հետաքրքրութիւն ներկայացնող շարք մը այլ հարցեր:
