48 Ժամեր Լիբանանի համար. Հարիրիի վերջի՞ն փորձը

 48  Ժամեր  Լիբանանի համար.  Հարիրիի  վերջի՞ն փորձը

Լիբանանցի ժողովուրդը  վճռորոշ   48   ժամերու առջեւ է։ Այս մասին տեղեկութիւն տարածած են լիբանանեան աղբիւրներ, հաղորդելով նաեւ, որ նշանակեալ վարչապետը, յառաջիկայ օրերուն պիտի այցելէ Գահիրէ եւ հանդիպում ունենայ Եգիպտոսի նախագահ զօր. Ապտըլ Ֆաթթահ Ալ Սիսիին հետ։

Կը նշուի նաեւ, որ Հարիրի Եգիպտոս իր տալիք այցէն անմիջապէս ետք պիտի ուղեւորուի Պաապտայի նախագահական պալատ եւ երկրի նախագահ զօր. Միշէլ Աունին ներկայացնէ նոր կառավարութեան կազմութեան ցուցակ-առաջարկը։

«Արեւելք» ի Պէյրութեան աղբիւրներ նաեւ կը հաղորդեն, որ Հարիրիի կողմէ ներկայացուելիք կառավարական առաջարկ-ցուցակը կազմուած է Ֆրանսայի նախաձեռնութեան հիման վրայ ու այդ ցուցակի կազմութեան մէջ կարեւոր դեր ունեցած է ներ-քաղաքական ընդհանուր պատկերին մէջ կարեւոր դեր ունեցող Խորհրդարանի նախագահ Նէպիհ Պըրրին։

Կը նշուի նաեւ, որ եթէ Հարիրի չկարողանայ ստանալ նախագահ Աունի նեցուկն ու  համաձայնութիւնը, ապա ան պիտի վճռէ եւ ներկայացնէ իր հրաժարականը։ Սպասենք զարգացումներուն։