Անյայտ կորսուած զինծառայողներու ծնողները կրկին Պաշտպանութեան նախարարութեան դիմաց էին: Անոնց մէկ մասը հանդիպում ունեցած է ՊՆ-ի մէջ:
Լրագրողներու հետ զրոյցի ժամանակ ծնողներէն մէկը յայտնած է. «Վաղարշակ Յարութիւնեանի հետ երկար զրոյց ունեցանք, մեր հարցերը, դժգոհութիւնները յայտնեցինք: Հինգ ծնողով բոլոր հարցերը չէինք կարող տալ, ներսից էլ յայտնեցին, որ ծնողները ցուցակագրուեն, մինչեւ հինգշաբթի, ուրբաթ խոստացել են, որ նորից կը հանդիպեն ծնողների հետ: Առաջին հերթին խօսել ենք գերիների հարցի մասին, յետոյ, թէ ինչ գործողութիւններ են իրականացւում, որ մենք վերջնակէտին հասնենք»:
Ծնողը փոխանցած է, որ Վաղարշակ Յարութիւնեանը տարբեր երկիրներու դեսպաններու հետ կը հանդիպի, որպէսզի որոշ ճնշումներու տակ գերիներու վերադարձ իրականացուի: Իսկ անյայտ կորսուածներու մասով Յարութիւնեանը վստահեցուցած է, որ համապատասխան քայլեր կ'իրականացուին: «Որեւէ խնդրի դրական լուծում չեղաւ: Լիարժէք պատասխան չստացանք այս հանդիպումից, մենք ուզում ենք տեսնել, այլ ոչ թէ լսել»:
Ծնողը ներկայացուցած է նաեւ, որ իրենց ներկայութեամբ Վաղարշակ Յարութիւնեանի կողմէ Ռազմական ոստիկանութեան պետը հրաման ստացած է, որ անյապաղ սպաները հաւաքեն եւ օգնեն ծնողներուն:
Նշենք, որ անցած շաբաթ վերջիններս կրկին ՊՆ-ի դիմաց կը պահանջէին Վաղարշակ Յարութիւնեանի հետ հանդիպում, սակայն այն տեղի չունեցաւ:
Անյայտ կորսուած զինծառայողներու ծնողները տեւական ժամանակ է՝ բողոքի հաւաքներ կ'ընեն՝ պահանջելով օր առաջ զբաղուիլ իրենց երեխաները գտնելու ուղղութեամբ որոնողական աշխատանքներով:
Միացիր մեզ Տելեգրամում
Միացիր մեզ Յութուբում
Կիսուիլ
