0.09c
Երեվան
ուրբ, փտր 06
Օրերս, Սուրբ Սարգիս զօրավարի տօնի առթիւ, Սուրբ եւ Անմահ Պատարագ մատուցուած է Քեսապի Սուրբ Միքայէլ Հայ Կաթողիկէ Եկեղեցւոյ մէջ՝ ձեռամբ Գերյ. Հայր Գառնիկ Ծ. Վրդ. Յովսէփեանի:
Այս մասին «Արեւելք» տեղեկացաւ Vaticannews-էն:
Լրատւութիւնը՝ ստորեւ։
Շաբաթ` 31 Յունուար 2026 թուականին, Սրբոցն Սարգսի զօրավարին եւ որդւոյ նորա Մարտիրոսի եւ չորեքտասան զինուորացն, Սուրբ եւ Անմահ Պատարագ մատուցուեցաւ՝ Քեսապի Սուրբ Միքայէլ Հայ Կաթողիկէ Եկեղեցւոյ մէջ՝ ձեռամբ Գերյ. Հայր Գառնիկ Ծ. Վրդ. Յովսէփեանի:
Սուրբ գրային ընթերցումներէն ետք, Գերյ. Հայր Սուրբը իր քարոզի մէջ ըսաւ․
« Սիրելի՛ քոյրեր եւ եղբայրներ ի Քրիստոս,
Այսօր, Սուրբ Սարգիս Զօրավարի տօնին առիթով, Սուրբ Եկեղեցին մեզ կը հրաւիրէ կանգ առնելու, խոկալու եւ խորապէս անդրադառնալու այն սուրբին կերպարին, որ դարեր շարունակ ապրած է մեր ժողովուրդի հաւաքական յիշողութեան, հաւատքի եւ սիրոյ մէջ։
Սուրբ Սարգիսը միայն պատմական անձ մը չէ, ոչ ալ միայն անցեալի նահատակ մը, այլ կենդանի ներկայութիւն մըն է մեր հոգեւոր կեանքին մէջ՝ որպէս հաւատքի, քաջութեան, զոհաբերութեան եւ սիրոյ անմար օրինակ։
Սուրբ Սարգիսը զօրավար էր՝ հմուտ, փորձառու եւ քաջ։ Սակայն ան իր կեանքին ընթացքին կանգնեցաւ ճակատագրական ընտրութեան առջեւ։ Աշխարհը իրեն կը խոստանար փառք, իշխանութիւն եւ ապահովութիւն, եթէ միայն հրաժարէր Քրիստոսէն։ Բայց ան ընտրեց խաչը։ Ընտրեց հաւատարմութիւնը՝ նոյնիսկ նահատակութեան գնով։
Այս ընտրութիւնը կը բացայայտէ Սուրբ Սարգիսի հոգեւոր մեծութիւնը. ան հասկցաւ, որ ժամանակաւոր փառքը անցողիկ է, իսկ Աստուծոյ հետ մնալը՝ յաւիտենական է։
Սուրբ Սարգիսի կեանքը մեզ կը սորվեցնէ, թէ հաւատքը տեսութիւն մը չէ միայն, այլ ապրուած ճշմարտութիւն։ Ան չբաւարարուեցաւ խօսքով քրիստոնեայ ըլլալով, այլ իր ամբողջ կեանքը դարձուց վկայութիւն։
Ան մեզ կը յիշեցնէ, որ քրիստոնէութիւնը յարմարաւէտութիւն չէ, այլ կոչում է՝ խաչ կրելու, ճշմարտութեան համար կանգնելու եւ Աստուծոյ կամքը մեր կեանքին մէջ իրականացնելու։
Սուրբ Սարգիսը մեր ժողովուրդին կողմէ ճանչցուած է որպէս արագահաս բարեխօս։ Ժողովուրդը զինքը սիրեց, որովհետեւ զգաց, որ ան մօտ է մարդուն կեանքին, մօտ է անոր վիշտին, կարօտին եւ երազանքներուն։
Սուրբ Սարգիսը դարձաւ սիրահարներու բարեխօս, երիտասարդներու հովանաւոր եւ կարիքաւորներու օգնական։ Այս ժողովրդական հաւատքը խոր հոգեւոր ճշմարտութիւն մը կը բացայայտէ՝ Աստուած Իր սրբերուն միջոցով կը մօտենայ մարդուն սրտին։
Ժողովրդական աւանդութիւններուն մէջ Սուրբ Սարգիսը կը պատկերացուի սպիտակ ձիու վրայ հեծած՝ որպէս մաքրութեան եւ լոյսի խորհրդանիշ։
Սիրելի՛ երիտասարդներ, Սուրբ Սարգիսի պատգամը այսօր ալ ուղղուած է ձեզի։ Այս ժամանակները լեցուն են անորոշութիւններով, գայթակղութիւններով եւ կեղծ արժէքներով։
Աշխարհը ձեզի կը խոստանայ արագ յաջողութիւն եւ հաճոյք, բայց շատ անգամ կը թողու դատարկ սրտեր։ Սուրբ Սարգիսը կը հրաւիրէ ձեզ ընտրելու հաւատքի ճանապարհը, սիրոյ ճշմարիտ իմաստը եւ զոհաբերութեան ուժը։ Ան կը սորվեցնէ, որ սէրը միայն զգացում մը չէ, այլ պատասխանատուութիւն, հաւատարմութիւն եւ Աստուծոյ օրհնութեան ներքեւ ապրելու պատրաստակամութիւն։
Եկեղեցւոյ մէջ երիտասարդութիւնը միայն տարիքային խումբ մը չէ, այլ՝ յոյսով բաբախող սիրտ մը եւ հոգի մը, որ կը կրէ վաղուան Աւետիսը։ Երիտասարդներու ներկայութեան մէջ կը տեսնենք այն խանդավառութիւնը, որ կը կենդանացնէ համայնքը, եւ անոնց աղօթքին մէջ կը շօշափենք պարզ ու խոր հաւատք մը, որ մեզ կը յիշեցնէ, թէ Աստուած միշտ կը գործէ երիտասարդ սրտերուն մէջ։
Սուրբ Եկեղեցին կը նորոգուի երիտասարդներով, վստահ քայլերով կը քալէ դէպի ապագան՝ հաւատալով, որ ամէն սերունդ կոչուած է ըլլալու լոյսին վկայ եւ միութեան ու յոյսի շինարար։
Սուրբ Սարգիսի տօնը մեզի համար հրաւէր մըն է վերանորոգելու մեր ուխտը Աստուծոյ հետ։ Եկէ՛ք մեզ հարց տանք՝ ո՞ւր կը գտնուի Քրիստոսը մեր կեանքին մէջ։ Ի՞նչ տեղ կը գրաւէ հաւատքը մեր որոշումներուն մէջ։ Սուրբ Սարգիսի օրինակով եկէ՛ք քաջութիւն ունենանք մերժելու այն, ինչ մեզ կը հեռացնէ Աստուծմէ, եւ ընտրելու այն, ինչ մեզ կը մօտեցնէ Անոր։
Եկէ՛ք աղօթենք, որպէսզի Սուրբ Սարգիս Զօրավարի բարեխօսութեամբ մեր ընտանիքները լեցուին սիրով եւ խաղաղութեամբ, մեր երիտասարդները գտնեն իրենց ուղին հաւատքով եւ իմաստութեամբ, եւ մեր հայ ժողովուրդը մնայ ամուր իր քրիստոնէական արժէքներուն մէջ։
Թող Սուրբ Սարգիսը ըլլայ մեր սրտերուն պահապանը, մեր սիրոյ առաջնորդը եւ մեր հաւատքի զօրացնողը։
Թող ան մեզ սորվեցնէ ապրել հաւատքով, սիրել մաքրութեամբ եւ յոյսով նայիլ ապագային՝ վստահելով Աստուծոյ անսահման ողորմութեանը։
Միասնաբար աղօթենք սիրոյ, հաւատքի, խաղաղութեան եւ օրհնեալ ապագայի համար։
Թող Սուրբ Սարգիսը ըլլայ մեր սիրոյ եւ մեր երազանքներուն հաւատարիմ պահապանը։
Բոլոր Սարգիսներուն անուանատօնը շնորհաւոր ըլլայ, մաղթելով առողջութիւն եւ երկարատեւ տարիներ»։
Սուրբ Պատարագէն ետք, եկեղեցւոյ խորանին առջեւ, տեղի ունեցաւ Երիտասարդներու Օրհնութեան Կարգ Սուրբ Սարգիսի Բարեխօսութեամբ։
Գերյ. Հայր Գառնիկ Ծ. Վրդ. Յովսէփեան
Քեսապ՝ 31 Յունուար 2026թ․
Ս․ Միքայէլ Եկեղեցւոյ Ժողովրդապետութիւն
