14.09c
Երեվան
երք, մյս 05
Հալէպի երեք ճակատներու վրայ ծանր մարտեր տեղի կ'ունենան: Այս մասին լուր փոխանցող աղբիւրներ նոյնպէս կը հաղորդեն, որ «Ալ Նըսրա» ճակատի մեծաթիւ զինեալներ գործողութիւններ սկսած են Հալէպի հիւսիսային եւ հարաւային շրջաններուն մէջ: Ըստ BBC Arabic կայանին թրքական բանակի զինուորներ տեսնուած են Հալէպի հիւսիսային հատուածներուն մէջ, եւ անոնք «Ալ Նըսրա» ճակատին կողքին կը մասնակցին մարտերուն: Աղբիւրը նաեւ կը նշէ, որ այդ համատեղ զօրքերուն թիւը կը հասնի 2000-ի եւ անոնք նպատակ դրած են մուտք գործել քրտական ջոկատներու տիրապետութեան տակ եղող Շէյխ Մաքսուտ շրջանը: Աւելի վաղ հաղորդուած էր, որ քրտական YPK ուժեր յաջողած են մուտք գործել Սուրիա- Թուրքիա սահմանին եղող Մընժէպ աւանը, որ կը համարուի Տահէշ ահաբեկչական խմբաւորման գլխաւոր կեդրոնատեղի: Ռուսական աղբիւրներ եւս խօսած են թրքական միջամտութեան մը մասին, առանց մեկնաբանելու գետնի վրայ ընթացող զարգացումները: Ինչ կը վերաբերի Հալէպի ներքին շրջաններուն վրայ կատարուած հրթիռարձակումներուն, կը հաղորդուի, որ այսօր Նոր Գիւղի եւ շրջակայ հատուածներուն մէջ զոհերուն թիւը հասած է 40-ի իսկ վիրաւորներունը ՝ 120-ի: Նախապէս «Արեւելք», այս մասին լուր փոխանցելով, նաեւ յայտնած էր, որ վիրաւորներուն մէջ կան հայեր:
