31.09c
Երեվան
ուրբ, սպտ 25
Ատրպէյճանի հետ խաղաղութեան հաստատումէն ետք Ռուսիոյ հետ Երեւանի յարաբերութիւնները կը գտնուին «փոխակերպման փուլի» մէջ։ Այս մասին ՄԱԿ-ի Ընդհանուր ժողովի 81-րդ նստաշրջանին յայտարարած է Հայաստանի վարչապետ Նիկոլ Փաշինեան՝ ընդգծելով, որ Հայաստանը կ՚առաջնորդուի բազմաբեւեռութեան տրամաբանութենէն բխող հաւասարակշռուած արտաքին քաղաքականութեամբ։
Անոր խօսքով՝ նախորդող ամբողջ շրջանին հայ-ռուսական յարաբերութիւններուն վրայ ազդող մեծագոյն գործօնը եղած է հայ-ատրպէյճանական հակամարտութիւնը։
«Հիմա, երբ Ադրբեջանի հետ խաղաղութիւն ենք հաստատել, Հայաստան-Ռուսաստան յարաբերութիւնները բնականօրէն փոխուելու են, եւ մեր ցանկութիւնն է, որ այդ յարաբերութիւնները զարգանան բարեկամութեան եւ փոխադարձ յարգանքի սկզբունքների հիման վրայ»,-յայտարարած է վարչապետը։
Անդրադառնալով տարածաշրջանային զարգացումներուն՝ կառավարութեան ղեկավարը ընդգծած է, որ արտաքին քաղաքական պատկերացումներուն համար առանցքային նշանակութիւն ունի դրացիներուն հետ յարաբերութիւններու կարգաւորումն ու խորացումը։ Ան մատնանշած է Թուրքիոյ հետ առկայ բարձր մակարդակի երկխօսութիւնը։
«Ուզում եմ հաստատել նախագահ Էրդողանի նախորդ օրն այս ամբիոնից ասած խօսքերն այն մասին, որ վճռականօրէն առաջ ենք մղում Հայաստան-Թուրքիա յարաբերութիւնների կարգաւորման գործընթացը»,-ըսած է վարչապետը։
Ան նաեւ շեշտած է, որ Իրանի եւ Վրաստանի հետ բարիդրացիութիւնը Երեւանի համար կը շարունակէ ունենալ «բացառիկ կարեւորութիւն»։
Վարչապետը միաժամանակ ուշադրութիւն հրաւիրած է միջազգային գործընկերներուն, այդ շարքին՝ Միացեալ Նահանգներու, Եւրոպական Միութեան, Ֆրանսայի, Գերմանիոյ, Չինաստանի եւ Կեդրոնական Ասիոյ երկիրներուն հետ ռազմավարական յարաբերութիւններու ընդլայնման վրայ։ Այս շրջածիրէն ներս ան առանձնացուցած է Եւրոպական յանձնաժողովին կողմէ Հայաստանի համար առեւտրային ինքնավար միջոցներ սահմանելու որոշումը՝ զայն որակելով իբրեւ «Հայաստան-Եւրոպական Միութիւն նոր որակի յարաբերութիւններու յաջորդ դրսեւորում»։
Ելոյթի աւարտին կառավարութեան ղեկավարը ՄԱԿ-ի անդամ երկիրներու ներկայացուցիչները հրաւիրած է Հայաստան, ուր Հոկտեմբերին պիտի հիւրընկալուի Կենսաբազմազանութեան մասին պայմանագրի Կողմերու 17-րդ համաժողովը։
