19.04c
Երեվան
շբթ, հնս 27
Սպանիոյ Ալկորկոն քաղաքը, 25 ապրիլին, պաշտօնապէս ճանչցաւ եւ դատապարտեց Հայոց ցեղասպանութիւնը։
Շուրջ 170 հազար բնակիչ ունեցող քաղաքը, այս որոշմամբ, միացած է Հայոց ցեղասպանութիւնը արդէն իսկ ճանչցած մօտ 30 սպանական քաղաքներուն։
Նախաձեռնութիւնը Սպանիոյ մէջ իշխող Ժողովրդական կուսակցութեան ներկայացուցիչները Ալկորկոնի քաղաքային խորհուրդի մէջ իրականացուցած են: Անոնց միացած են նաեւ միւս քաղաքական ուժերու ներկայացուցիչները:
Ընդունուած որոշման մէջ մասնաւորապէս ըսուած է. «Հայոց ցեղասպանութիւնը 20-րդ դարու առաջին ցեղասպանութիւնն էր: Այս յայտարարութեամբ Ալկորկոնի քաղաքապետարանը կը ճանչնայ մարդկութեան դէմ գործուած այս յանցագործութիւնը, որ մէկ ու կէս միլիոն հայու կեանքը խլեց եւ երկու միլիոն մարդ լքեց իր բնօրրանը»:
Քաղաքային խորհուրդը նաեւ իր աջակցութիւնը յայտնած է ողջ հայ ժողովուրդին եւ կոչ ըրած է Սպանիոյ կեդրոնական իշխանութիւններուն օր առաջ ճանչնալ եւ դատապարտել Հայոց ցեղասպանութիւնը:
Քաղաքապետարանի նիստին ներկայ եղած են նաեւ հայ համայնքի եւ Մատրիտի «Հայ տուն» մշակութային միութեան ներկայացուցիչներ, որոնց ներկայացուցած խնդրագիրի հիման վրայ ընթացք տրուած է այս գործընթացին:
