Ապրիլ 24-ի՝ արտակարգ ձեւաչափով յիշատակի միջոցառումները Երեւանի մէջ եզրափակուեցան ուշ երեկոյեան մեկնարկած «Ոգեկոչման գիշեր» միջոցառմամբ: ժամը 22:00-ին Ծիծեռնակաբերդի բարձունքին մեկնարկեց յիշատակի համերգը:

Համերգի բացումը խորհրդանշական էր. աշխարհահռչակ երաժիշտ Նարեկ Հախնազարեանը կատարեց հայրենիքի կարօտի խորհրդանիշ դարձած «Կռունկը»: Հախնազարեանը, ի դէպ, վերջերս վերադարձած է Ռուսաստանէն եւ 14 օր գտնուած է մեկուսացման մէջ:

Համերգին զուգահեռ մեկնարկեցաւ նաեւ առցանց (վիրթուալ) երթը. առաւօտիէն քաղաքացիները Հայաստանէն, Արցախէն եւ Սփիւռքէն իրենց անուն ազգանունները ուղարկած էին խորհրդանշական 1915 համարին (Սփիւռքէն՝ 00 374 33 19 15 00): Անոնց բոլորի անունները պատկերուեցան յուշակոթողի 12 սիւներուն: Ժամը 23:00-ի դրութեամբ առցանց երթին մասնակցելու 852 հազար 341 անուն ազգանուն ուղարկուած էր:

Լուսային շոուն ապահոված էր C-squared կազմակերպութիւնը, գոյները նոյնպէս խորհրդանշական էին՝ անմեղ զոհերու թափած արեան կարմիրը եւ անմոռուկի մանիշակագոյնը:

Թէեւ Ծիծեռնակաբերդի բարձունքը փակ էր քաղաքացիներու համար, եւ ծաղիկներ խոնարհած էին բարձրաստիճան  քանի մը պաշտօնեաներ, այնուամենայնիւ, ամէն տարուայ նման անմար կրակի մօտ բազմաթիւ ծաղիկներ դրուած էին: Կառավարութիւնը 105 հազար ծաղիկ գած էր ջերմոցային տնտեսութիւններէն:

Համերգը աւարտեցաւ առաւօտեան ժամը 06:00-ին, որ հնարաւորութիւն տրուի Սփիւռքի մեր հայրենակիցներուն նոյնպէս մասնակցիլ առցանց երթին: