13.09c
Երեվան
ուրբ, մյս 15
Մինչ առաւօտ կանուխ լիբանանեան բանակը հրադադար կը յայտարարէր «Ռաս Պաալպէք»ի եւ «Ալ Քահ» շրջաններու ճակատներուն վրայ, անդին տեղեկութիւններ շրջան կ'ընէին, որ բանակը անուղղակի բանակցութիւններ կը կայացնէ «Տահէշ»ի պատասխանատուներուն հետ պարզելու համար 3 տարի առաջ ահաբեկիչ զինեալներուն կողմէ գերեվարուած 9 զինուորներու ճակատագիրը: Յետմիջօրէին Լիբանանի ընդհանուր ապահովութեան գործակատար` զօր. Ապպաս Իպրահիմ կը հասնէր գերեվարեալ զինուորներու ծնողներու նստացոյցի վայր ու հոնկէ կը յայտարարէր, որ «Ցաւօք այս պատմութիւնը տխուր աւարտ մ'ունեցաւ եւ մենք իմացանք, որ բանակի 9 զինուորները սպաննուած են «Տահէշ»ի ձեռամբ»: Զօր. Իպրահիմ նաեւ ըսաւ, որ բանակի յատուկ պատուիրակութիւն մը ուղղուած է «Տահէշ»ի տիրապետութեան տակ եղող շրջաններ ստանձնելու համար 8 դիակներ, որոնք պիտի փոխադրուին բանակային հիւանդանոց եւ ենթարկուին յատուկ զննումներու վերջնականացնելու համար զինուորներուն սպաննուած ըլլալու մասին տեղեկութիւնը:
Նշենք, որ քննութեան աւարտին «Տահէշ»ի զինեալները պիտի հեռանան «Ռաս Պաալպէք»էն եւ ցամաքային ճանապարհով մեկնին ՝ Տէր Զօր:
Զօր. Իպրահիմի կատարած յայտարարութենէն ետք հիսաթափութեան ծանր մթնոլորտ տիրեց բանակի զինուորներու ծնողներուն մօտ, որ անցնող 3 տարիներուն տարբեր միջոցներով փորձեցին իրենց զաւակներուն դատը հետպնդել:
Յառաջիկայ օրերուն աւելիյստակ պիտի դառնայ «Տահէշ»ի զինեալներուն ճակատագիրը, որոնց թիւը ըստ լիբանանեան ԶԼՄ-ներու կը հասնի 600-ի:
