12.09c
Երեվան
չրք, մյս 06
Հայաստանի Հանրապետութեան «Ազգային Անվտանգութեան Ծառայութիւն»ը Երեւանի Էրէբունի շրջանին մէջ տեղի ունեցող դէպքերուն վերաբերեալ երկրորդ հաղորդագրութեամբ մը հանդէս եկած է: Հաղորդագրութեան մէջ ԱԱԾ-ն կոչ կ'ուղղէ բոլոր լրատուամիջոցներուն դէպքին վերաբերեալ լրատուութիւն կատարելու համար օգտուիլ պաշտօնական աղբիւրներու հաղորդագրութիւններէն, յուշելով նաեւ, որ հակառակ պարագային եղած ապատեղեկատուութիւնը կրնայ նպաստել յանցաւոր կողմի գործողութիւններու իրականացման: Կը նշուի նաեւ, որ առաւօտ կանուխ զինեալներու խումբ մը մուտք գործած է Էրէբունի շրջանին մէջ եղող ոստիկանական պահակային կեդրոն մը, ուր զինեալներ պատանդ վերցուցած են զօրանոցին մէջ գտնուող ոստիկաններ: Աւելի ուշ փոխանցուեցաւ նաեւ, որ տեղի ունեցող պատշաճ գործողութիւններուն ընթացքին զոհուած է մէկ ոստիկան եւ կան վիրաւորեալներ: Ներկայ պահու դրութեամբ համապատասխան աշխատանքներ կը տարուին անօրինական այս արարքը իր աւարտին տանելու համար: Նշենք, որ զինեալները, որպէս հիմնական նախապայման դրած են Ժիրայր Սէֆիլեանի ազատ արձակումը:
