24.09c
Երեվան
ուրբ, սպտ 13
Կազմակերպութեամբ ՀՅԴ ԼԵՄ-ի Կեդրոնական վարչութեան, կիրակի, 4 օգոստոս 2024-ին տասնեակ մը ԼԵՄ-ականներ խանդավառ մթնոլորտի մէջ ուղղուեցան Այնճար` ԼԵՄ-ի բանակավայր: Կէսօրին տեղի ունեցաւ պաշտօնական բացումը ՀՅԴ ԼԵՄ-ի 2024 տարուան «Վերադարձ դէպի արմատներ» խորագիրը կրող բանակումին, որուն իրենց մասնակցութիւնը բերին նաեւ Սուրիոյ երիտասարդական միութեան անդամներ:
Արցախի կորուստէն եւ հայ ժողովուրդի աղէտալի ներկայ իրավիճակէն մեկնած` ԼԵՄ-ը իր յունուար 2024-ին գումարուած 29-րդ Պատգամաւորական ժողովին ընթացքին հաստատեց յեղափոխական արմատներու պահպանման եւ ամրապնդման կարեւորութիւնը` ընդգծելով, որ այդ աւանդոյթները պէտք է պահպանուին` զանոնք համալրելով նորօրեայ միջոցներով ու զէնքերով, սակայն` յեղափոխականը հիմք նկատելով որեւէ ծրագիրի կամ աշխատանքի:
Բացման արարողութեան խօսք առին ՀՅԴ Լիբանանի Կեդրոնական կոմիտէի կազմակերպական ներկայացուցիչ Ալպեր Պալապանեան եւ ՀՅԴ ԼԵՄ-ի Կեդրոնական վարչութեան ատենապետ Գէորգ Եագուպեան:
Ա. Պալապանեան անդրադարձաւ ՀՅԴ ԼԵՄ-ի տարեկան բանակումներու եզակի դերակատարութեան եւ ազդեցութեան ոչ միայն դաշնակցական երիտասարդութեան կերտման եւ առօրեային, այլ նաեւ համայն լիբանանահայ եւ արտերկրի գաղութներու զարգացման իմաստով` նկատի ունենալով, որ տարիներ շարունակ տասնեակ երկիրներու երիտասարդական միութիւններ փափաքած են մասնակցիլ այս բանակումներուն եւ զանոնք նկատած են դաշնակցական դաստիարակութիւնը ամբողջացնելու առիթ: Ան հաստատեց, որ ԼԵՄ-ի բանակումին ընթացքին փոխանցուած գիտելիքները եւ նիւթերը գլխաւոր դեր կը խաղան հայ երիտասարդի նկարագիրի կերտման գերագոյն առաքելութեան մէջ, որովհետեւ ԼԵՄ-ը` իբրեւ դաստիարակչական միաւոր, իր ուսերուն 51 տարիներ շարունակ վերցուցած է այս աշխատանքը յաջողցնելու ծանր պատասխանատուութիւնը:
Գէորգ Եագուպեան, իր կարգին, հաստատեց, որ բանակումը եզակի առիթ է ամբողջացնելու միութեան դաստիարակչական ծրագիրը այնպիսի միջավայրի մէջ, ուր իւրաքանչիւր ԼԵՄ-ականի կամ կազմակերպողի ամէն օր յաւելեալ առիթ ու աւիշ կը տրուի աւելի դաշնակցականանալու: Ան հաստատեց, որ ՀՅԴ ԼԵՄ-ը մուտք գործած է իր պատմութեան երկրորդ յիսնամեակը` առաջնահերթութիւն ունենալով ազգային արժէքներու պահպանումը, յեղափոխական արմատներու ամրապնդումը եւ արցախեան հիմնահարցի ճրագը անմար պահելը:
Բանակումին ընթացքին ԼԵՄ-ականները օրական ունեցան իրենց յայտագիրները, ամէն երեկոյ տեղի ունեցան խարուկահանդէսներ, որոնց ընթացքին երիտասարդները երգեցին յեղափոխական երգեր եւ ստեղծեցին խանդավառ մթնոլորտ:
Դաստիարակչական իմաստով, տեղի ունեցան ամէնօրեայ դրութեամբ դասախօսութիւններ եւ տեսերիզներու ցուցադրութիւնները, ինչպէս նաեւ` զարգացման մրցում եւ դէմքի ու դէպքի ներկայացումներ: Դասախօսական շարքը ընդգրկեց տարբեր նիւթեր` ԼԵՄ-ի տիպարին եւ 21-րդ դարուն պայքարը շարունակելու ձեւերուն մասին խօսեցաւ Շաղիկ Գանտահարեան-Խիւտավէրտեան, պատմութեան ընթացքին ապազգային շարժումները ներկայացուց Այնճարի քաղաքապետ Վարդգէս Խօշեան, Քրիստափոր Միքայէլեանի կեանքը եւ տիպարը` Եսայի Հաւաթեան, հայ ժողովուրդի արմատներն ու քաղաքական պատմութիւնը` Գէորգ Եագուպեան, 20-րդ դարուն Հայ դատի մղուած պայքարը տարբեր ճակատներու վրայ` ՀՅԴ Լիբանանի Կեդրոնական կոմիտէի եւ Հայկական երեսփոխանական պլոքի ներկայացուցիչ Յակոբ Բագրատունի, Արցախի եւ Հայաստանի ներկայ իրավիճակները` Բենիամին Պչաքճեան, իսկ ազատագրական պայքարի ու Դաշնակցութեան հիմնադրութեան սկզբնական տարիները` Վիգէն Աւագեան:
Բանակումի վերջընթեր օրը հանդիսացաւ մարզական խաղերու օր, իսկ գիշերը ԼԵՄ-ականները իրենք պատրաստեցին խարուկահանդէսի յայտագիրը, որուն ընթացքին ներկայացուցին երգիծական, յեղափոխական, ազգային կամ ընկերային նիւթերու շուրջ զանազան ներկայացումներ:
Փակման արարողութիւնը տեղի ունեցաւ կիրակի, 11 օգոստոս 2024-ին: Խօսք առաւ ՀՅԴ Լիբանանի Կեդրոնական կոմիտէի անդամ Յարութ Յարութիւնեան` նշելով, որ բանակումին ընթացքին ԼԵՄ-ականները կը քաղեն հիմնական երեք արժէքներ` կարգապահութիւն, ազգային ու յեղափոխական դաստիարակութիւն եւ ամէնէն կարեւորը` ընկերասիրութիւն: Ան հաստատեց, որ մասնաճիւղային աշխատանքներու եւ ԼԵՄ-ի առօրեայ ծրագիրներուն ընդմէջէն կը յստականայ ԼԵՄ-ի յաջողութիւնը` իր անդամներուն ցուցաբերած բծախնդրութեամբ, կարգապահութեամբ, բարձր գիտակցութեամբ եւ ընկերասիրութեամբ, որ հիմքն է դաշնակցական երիտասարդութեան հիմա եւ ընդմիշտ:
ԼԵՄ-ականները բարձր տրամադրութիւններով վերադարձան իրենց տուներն ու ակումբները:
Լուրը՝ «Ազդակ»էն
