Ն.Ս.Օ.Տ.Տ. Գարեգին Բ. Ամենայն Հայոց Կաթողիկոսը Մայր Աթոռ Ս. Էջմիածնի մէջ պաշտօնական այցով ընդունած է Հայաստանի մէջ Եգիպտոսի դեսպան Պահա Տեսուքին, ներկայութեամբ Եգիպտոսի Հայոց թեմի առաջնորդ Տ. Աշոտ եպիսկոպոս Մնացականեանի: Պատուիրակութեան մաս կը կազմէր Եգիպտոսի Հայ Դատի յանձնախումբի ատենապետ Տոքթ. Արմէն Մազլումեան:
Վեհափառ հայրապետը բարձր գնահատած է Եգիպտոսի ու անոր նախագահ Ապտէլ Ֆաթթահ Սիսիի դերը Հարաւային Կովկասի մէջ խաղաղութիւն հաստատելու եւ Հայաստանի ու Ատրպէյճանի միջեւ պատերազմը դադրեցնելու գործին մէջ:
Գարեգին Բ. կաթողիկոսը բարձր գնահատած է նաեւ Եգիպտոսի պատմական դերը՝ հայ ժողովուրդը հիւրընկալելով իր հողերուն վրայ, նշելով. «Մենք առանձնայատուկ յարաբերութիւններ ունինք Եգիպտոսի հետ, եւ ուրախ ենք եգիպտահայ համայնքին ունեցած դերով՝ ի նպաստ Եգիպտոսի բարգաւաճման ու յառաջընթացին եւ երկու ժողովուրդներուն միջեւ յարաբերութիւններու ամրապնդման գործին մէջ»:
Կաթողիկոսը հաստատեց, որ Աղեքսանդրիոյ եկեղեցւոյ Թուատրոս Բ. պատրիարքը նպաստած է հայ եւ եգիպտական եկեղեցիներուն միջեւ ամուր յարաբերութիւններու ամրապնդման, յարաբերութիւնները որակելով աւելի քան գերազանց:
Գարեգին Բ. ողջունեց նաեւ Ալ Ազհարի դերը հոգեւոր դիւանագիտութեան խթանման եւ մարդկային եղբայրութեան եւ միջկրօնական երկխօսութեան նախաձեռնութիւններու աշխուժացման գործին մէջ, որովհետեւ բոլոր կրօնները կը գործեն մարդկութեան բարգաւաճման համար:
Նիւթի հեղինակ՝ Սայէտ Մահմուտ («Ալ Ահրամ»ի աշխատակից):